Kirola
BINKE / 2022ko uztaila

Eibarrek Jone Ibañez futbolari galdakoztarra fitxatu du

TESTUA: Beñat Armentia Arriandiaga
ARGAZKIA: RC Deportivo

Joan den astean eman zuen jakitera futbolari galdakoztarrak sare sozialen bitartez urtebete Depor Abanca taldean egin ostean hau utzi behar zuela. Handik eta egun gutxira berriz talde gipuzkoarrak argitaratu zuen bere fitxaketa.  

Ia hamar urtez Athleticen aritu den futbolari galdakoztarra da Jone Ibañez (Galdakao, 1997). Ez da oraindik urtebete pasa talde bizkaitarra utzi eta bizi osoan zehar aritu zen taldetik alde egin zuela. Orain urtebete inguru ibilbide berriari ekin eta Galiziara egin zuen alde, Depor Abanca taldearekin batera goi mailako futbolean jarraitzeko asmoarekin.

Athleticeko lehen taldearekin 2015ean egin zuen debuta, eta osotara 78 partida jokatu zituen bertan, Primera Iberdrola zein Copa de la Reina lehiaketetan, eta bi gol egin guztira. Espainiako emakumezkoen selekzioarekin hainbatetan aritu zen 19 urte azpiko mailan, hain justu talde bizkaitarraren lehen taldearekin debuta egin zuen urte berean.

Joan den denboraldian zehar, Depor Abancarekin aritu den honetan ozta eutsi diote mailari, «playout»-ak behin jokatuta lortu zuten datorren denboraldian bigarren mailan jarraituko zutenaren bermea. Denboraldia behin bukatuta eman zuen jakitera Ibañezek bere erabakia sare sozialen bitartez, eta bertan adierazi zuen hurrengo denboraldian ez zuela Coruñako taldean jarraituko.

Sarean argitaratutako idatzian ondoko hau adierazi zuen: «Inoiz ez da erraza agur esatea, baina urtebete nahikoa izan zait konturatzeko talde honek duen handitasuna». Aurreko esaldi horri ere gaineratu zion «soilik esker oneko hitzak dituela taldearen parte den jende guztiarentzako, baita zerbitzu-mediku, fisio zein beste edozein langilerentzako». Mezuarekin amaitzeko esker oneko hitzak eskaini zizkion Ibañezek zaletuei, idatzian adierazi bezala, «haiek gabe ez baitzen gauza bera izango».

Gauzak horrela, beraz, jokalari galdakoztarrak bere goi-mailako futbol ibilbidearekin darrai eta datorren denboraldian S.D. Eibar taldean jokatuko du.