Errege Magoak Galdakaoko eta Usansoloko umeekin izango dira bihar

TESTUA: Irati Alonso García
ARGAZKIA: Peio Zamalloa

Kolore eta gozokiz beteko dituzte bihar, urtarrilak 5, Galdakaoko eta Usansoloko kaleak Meltxor, Gaspar eta Baltasarrek. Hemen batu ditugu gure herrietan egingo dituzten kalejiren ordutegiak.

Beste urte batez, Errege Magoek Galdakao eta Usansolo bisitatuko dituzte. Meltxor, Gaspar eta Baltasar gure herrietako kaleetan zehar izango dira bihar, urtarrilak 5.

Galdakaon Errege Magoek egingo duten kalejira 16:30ean hasiko da, Bengoetxeko elizaren ondoko aparkalekuan. Bertan tailerrak, aurpegi margoketa eta bingo musikala izango dira.

Ondoren, 18:00etan, Errege Magoek eta Gabonek bertaratutako herritarrentzat hitz batzuk izango dituzte eta udaletxe plazarainoko ibilbide musikatu honetan, pila sorpresa ikusteko aukera izango da eta glutenik gabeko gozokiak banatuko dira. Bengoetxetik abiatuta, kabalgatak Sixta Barrenetxea zeharkatuko du eta Bizkai kaletik igaroko da, Urretako kiroldegian jaiotza biziduna ikusteko aukera izanik. Bizkai kalearen amaieran Zamakoarantz abiatuko dira, eta, azkenik, Juan Bautista kaletik gorantz egingo dute udaletxera iritsi arte.

Bertan, Gabonek eta Errege Magoek galdakoztarrentzako mezua zabalduko dute eta, jai giroan, haur guztien eskakizunak entzun eta euren gutunak jasoko dituzte. Gainera, udaletxeko plazan Argizaiko gurasoek prestatutako txokolatada bikaina egongo da. Era berean, Galdakaoko Boluntarioen Giza Elkartearekin elkarlanean antolatutako elikagai bilketa bat ere izango da, eta Argizaiko begirale ohiek errebindikazio eszena bat antolatuko dute bertan.

Usansolon aldiz, Errege Magoen kabalgata 18:45ean hasiko da geltokitik eta herritik zehar izango dira umeei gozokiak eta ilusioa banatzen.