Galdakao Dantz ekitaldirako sarrerak dagoeneko salgai daude

TESTUA: Irati Alonso García
ARGAZKIA: Galdakaoko Udala

Torrezabal Kultur Etxeak Galdakao Dantz ekitaldiaren edizio berria hartuko du apirilaren 22an. Saioan Break on Stage-rako sailkapen lehiaketa ikusteko aukera izango da eta sarrerak salgai daude jada.

Beste urte batez, Galdakao Dantz ekitaldia antolatuko dute Torrezabal Kultur Etxean. Aurten apirilaren 22an izango da eta sarrerak salgai daude dagoeneko. Torrezabaleko txarteldegian, kutxazainean eta Udalaren webgunean lortu daitezke.

Dantza urbanoen estilo anitzak ikusteko aukera emando du Galdakao Dantz ekitaldiak. Batetik, Break On Stage jaialdiaren finalaurrekoa ospatuko da. 16:00etatik aurrera junior kategoriako (15 urtetik beherakoak) dantzariak arituko dira eta 19:00etan kategoria absolutukoak (16 urtetik gorakoak). Halaber, talde esperimentalak bi emanaldietan zehar tartekatuko dira.

Irabazleek, diruaz gain, maiatzaren 6an ospatuko den Break On Stage jaialdian parte hartzeko aukera izango dute. Horretarako, epaimahai profesionalak baloratuko dituen hiru ikuskizun eskeiniko ditu talde bakoitzak.