Galdakaon eta Usansolon beira biltzeaz arduratzen diren langileek hitzarmen berria sinatu dute
TESTUA: Irati Alonso García
ARGAZKIA: E. E.
Hainbat hilabeteko mobilizazioen ondoren, Ecovidrio enpresako langileek hitzarmen berria sinatu dute eta honi esker hauen erosteko ahalmena bermatu da. Ecovidriok Arabako, Gipuzkoako eta Bizkaiko udalerri guztietan beira biltzen du, tartean Galdakaon eta Usansolon.
Arabako, Gipuzkoako eta Bizkaiko udalerri guztietan beira biltzen du Ecovid rio enpresak, tartean Galdakaon eta Usansolon. Enpresa honetako langileek mobilizazioak egin dituzte hitzarmen berria eskatzeko eta hauen ostean akordioa lortu dute, ELA sindikatuak jakinarazi duenez.
Akordioak langileen erosteko ahalmena bermatuko du, KPIari lotutako soldata igoerekin. Halaber, langile batzuen kasuan, soldata igoera horiek %20, %30 eta %40tik gorakoak dira, izan ere, langileek lan bera egin arren, «soldata erabat desberdina zuten».
ELAk adierazi duenez, hitzarmen hori honako eduki nabarmenekin sinatu da, besteak beste:
1. Indarraldia: 2024-2026.
2. KPIa langile guztientzat, eta soldatak homogenizatzea; kasu batzuetan, soldata igoerak %20, %30 eta %40tik gorakoak dira.
3. Urteko lanaldia 1826 ordutik 1592ra murriztea.
4. Gaixotasun arruntagatik aldi baterako ezintasunak modu nabarmenean osatzea.
5. Jaiegunetako soldata igoerak.
6. Subrogazio bermea hobetzea.
7. Seme-alabak dituzten langileentzako hileko dirulaguntzak.
8. Langileen batzarretarako ordaindutako orduak.
Urtebeteko negoziazioaren ondoren, ELAk 15 eguneko greba deitu zuen, eta zuzendaritzak hitzarmen berria negoziatzea onartu zuen. «Hobekuntzak nabarmenak dira, are gehiago langileen soldata eta lan baldintza desberdinak kontuan hartuta. Horrela, plantillaren lan baldintzak hobetzeaz gain, plantilla osoa kolektiboki parekatzea ere lortu da», azpimarratu du sindikatuak.
