Gorka Urbizu, Anari, Porrotx, Ana Goitia eta Antton Telleria, Torrezabalen
TESTUA: Irati Alonso García
ARGAZKIA: BINKE
Torrezabal Kultur Etxeak 23 ikuskizun eskaniko ditu hilabete honetatik ekainera bitarte. Besteak beste, Gorka Urbizu, Anari, Porrotx, Ana Goitia eta Antton Telleria arituko dira Galdakaoko aretoan.
Torrezabal Kultur Etxeak hurrengo barikuan, urtarrilak 17, estreinatuko du urtea eta ekainera bitarte 23 ikuskizun eskainiko ditu guztira. Galdakaoko Udalak musikaz, antzerkiaz, dantzaz, umoreaz eta askoz gehiagoz gozatzeko egitaraua prestatu du hurrengo hilabeteetarako, BINKEk jaso zuen moduan.
Urtarrilaren 24an adibidez, Amets Arzallusek idatzitako eta Artedramak antzerkira egokitutako ‘Miñan’ ikuskizuna helduko da Torrezabalera. Honetan, migratzaileen odisea azaltzen du Arzallusek, Ibrahimaren esperientziaren bitartez.
Musikari dagokionez, hainbat estilo jorratuko da aretoan. Anarik, esaterako, ‘Giza zarata’ izeneko zazpigarren lana aurkeztuko du Galdakaon martxoaren 29an eta Gorka Urbizuk aldiz, ‘Hasiera bat’, bere izenez sinatzen duen lehen diskoa, aurkeztuko du ekainaren 13an.
Galdakoztarrek ere lekua izango dute Torrezabalen, izan ere, Da Capo Musika Bandak hiru kontzertu emango ditu aretoan hurrengo hilabeteetan zehar,10. urteurrena ospatzen duen urte honetan: ‘Pangea & Abraham Cupeiro’ otsailaren 16an, Celia Dávila eta Daniel Lozanorekin batera martxoaren 30ean eta maiatzaren 18an aldiz, printze txikiaren interpretazioa.
Enrike Solinis galdakoztarra ere arituko da egitarau zabal honen barruan, Euskal Barrok Ensemble taldearekin batera. ‘Euskelelea’ ikuskizun familiarra eskainiko dute urtarrilaren 25ean, tradiziozko musika berreskuratuz.
Bestalde, umoreak ere bere tartea izango du programa honetan, kasu honetan Ana Goitiaren eta Antton Telleriaren eskutik. Goitiak ‘Katana’ bakarrizketa eskainiko du martxoaren 7an eta Telleria ere bakarrizketa formatuan arituko da Torrezabalen, kasu honetan apirilaren 11n.
Umeentzako ikuskizunak ere hartuko ditu Torrezabalek, esaterako, Porrotx, Marimotots, Pupu eta Loreren ‘Ostirala iritsi da!’ maiatzaren 31n.
Egitarau osoa ezagutu deskargatu daiteke hemen.
