Greba feminista orokorra prestatzeko asanblada antolatuko dute bihar Torrezabalen
TESTUA: Irati Alonso García
ARGAZKIA: Aitzol Zamalloa
Euskal Herriko mugimendu feministak greba feminista orokorrera deitu du azaroaren 30erako. Honen nondik norakoak zehaztu eta «Galdakaon mailan antolatzen hasteko», asanblada feminista egingo dute bihar Torrezabalen.
Lehen aldiz, greba feminista orokorra egingo da azaroaren 30ean Euskal Herrian. Mugimendu feministak antolatutako mobilizazioak «ehun produktibotzat hartzen dena gelditzea eta zaintza esparru osoa problematizatzea eta berrantolatzea» izango dira helburuak.
Grebaren nondik norakoak zehaztu eta «Galdakao mailan antolatzen hasteko», asanblada feminista egingo da bihar Torrezabal Kultur Etxeko erakusketa gelan 19:30ean, Mozoilo Moreak taldeak antolatuta.
«Oso gutxi falta da grebarako eta lan handia dugu aurretik. Beraz, zabaldu inguruan deialdia eta batu borroka feministara!», adierazi dute antolatzaileek.
