Gumuzioko Garapen Zentroa ezarriko du Udalak Erletxeko eskola zaharrean
TESTUA: Irati Alonso García
ARGAZKIA: Galdakaoko Udala
Erletxeko eskola zaharraren eraikinean Gumuzioko Garapen Zentroa ezarriko du Udalak. Dagoeneko hasi dituzte egokitze-lanak Galdakaoko Udaleko enplegu planetako langileek, formazioa jaso ondoren.
Formazioa jaso ondoren modu praktikoan ari dira ikasitakoa gauzatzen Galdakaoko enplegu planetako langileek. Zehazki, Erletxeko eskola zaharra egokitzen ari dira eta bertan Gumuzioko Garapen Zentroa egingo dute.
«Erletxeko Industrialdea bertan izanik, hango enpresek erabili ahal izango dute, besteak beste, jardunaldiak, formazio saioak, erakusketak eta beste ekintzak egiteko», azaldu dute Udaletik.
Udalarekin zerikusia ez zuen elkarte batek erabili du urte askotan eraikin hori. Horretarako hitzarmena 2013tik iraungita zegoen, eta beraz, hustu ondoren, erabilera berrietarako egokitzen ari da gunea Udala.
Iñigo Hernando alkateak, Javier Ibarretxe Ekonomia Sustapenerako zinegotziak eta Jose Luis Bernal Enplegu zinegotziak eraikina erakutsi zien Erletxeko Industrialdeko Enpresa Elkarteko ordezkariei, eta Udalak dituen asmoen berri eman zion Begoña Ojanguren elkarteko presidentea buru izan zuen ordezkaritzari.
Bestalde, Erletxeko Industrialdeko elkartearekin akordioa sinatu duela iragarri du Udalak. 90.000 euroko laguntza emango dio, «poligonoa egokitzen joan dadin, horrela enpresa gehiago erakar daitezen, eta ondorioz, herriko ekonomia, enplegua, eta beraz, ongizatea sustatu dadin».
