Marifeli Ugarte galdakoztarra hil da, Orreaga Iritzi Taldeko kide historikoa
TESTUA ETA ARGAZKIA: Jon Gomez Garai
Nafarzaletasunean eta naziogintzatik «ezkutuko lan handia» egin duen Marifeli Ugarte galdakoztarra hil da, 80 urte dituela. Orreaga Iritzi Taldeko kide historikoa gaur agurtu du herriak, bere bilobak dantzatutako Ohorezko Agurra eta guzti.
Irailaren 6 goizaldean zendu da Marifeli Ugarte galdakoztarra, 80 urte dituela. Ugarte ezaguna izan da 30 urtetik gorako ibilbidean nafar estatuaren aldeko pentsamendu eta borrokan egin duen lanagatik. Ondo ezagutzen zutenek hala kontatu diote BINKEri ere: «Langile nekeza zan, baina beti bigarren planoan egoten zan, isilpeko lana egiten».
Galdakoztarra gainera, bere garairako, «oso aurreratua» zela diote bera ondo ezagutu dutenek: «Bere gazte denboratan gitxik esan ahalko dabe, emakumea izanda, unibertsitate ikasketak izan dituanik». Ekonomia- eta enpresa-zientziak ikasi zituen, eta gazte zela hasi zen Igorreko Batz kooperatiban lanean. Arratiako enpresa ezagunetik mundu osoan ezaguna den Irizar enpresara egin zuen jauzi Marifeli Ugartek.
Sindikalismoan ere ibilitakoa izan da Ugarte, baina batez ere Euskal Herriak nafarzaletasunean eta naziogintzan egin duen lanagatik gogoratuko du galdakoztarra. Orreaga Iritzi Talde galdakoztarreko kide historikoetakoa izan da galdakoztarra eta bere taldeko kideekin batera antolatzen zituen urtero, besteak beste, elkarte honen hitzaldi zikloak.
Gaur eman dio herriak azken agurra, hilak 7 dituela, Galdakaoko Santa Maria parrokian. Elizkizunaren amaieran bere bilobak Ohorezko Agurra dantzatu dio Marifeliri, amamaren gorpua aurrean zuela eta bertaratutako guztien presentzian.
