Maximo Moreno Musika Eskolan matrikulatzeko epea maiatzaren 5etik 23ra zabalduko da
TESTUA: Irati Alonso García
ARGAZKIA: Galdakaoko Udala
Maiatzaren 5etik 23ra zabalduko da Galdakaoko Maximo Moreno Musika Eskolan 2025-2026 ikasturterako matrikulatzeko epea. Matrikula Udalaren webgunearen bitartez edo musika eskolan bertan egin daiteke.
Galdakaoko Maximo Moreno Musika Eskola hurrengo ikasturterako prestatzen ari da eta maiatzaren 3tik 25era zabalduko du matrikulatzeko epea. Udalaren webgunearen bitartez edo musika eskolan bertan egin ahal izango da.
Bertan egitekotan honako ordutegian bertaratu ahal izango dira herritarrak: astelehen eta eguenetan, 11:00etatik 14:00etara eta 16:00etatik 19:00etara, eta martitzen, eguazten eta barikuetan, 09:00etatik 14:00etara.
Maximo Moreno Musika Eskolak lau maila eskaintzen ditu, musikarekin lehen harremana izateko mailan hasi, eta hobekuntzarako mailara arte. Adinari dagokionez, matrikularen urte naturalean 5 urte betetzen dituzten haurrek eta adin horretatik gorakoek ikasi ahalko dute eskolan. Horien artean, abesbatzarako aukera, hezkuntza bereziko musika gela, batukada eta pandero ikastaroak aurkitu daitezke.
Gainera, konboa ere eskaintzen da (rock, jazz eta abarreko instrumentu taldeak). Guzti hauetan, musika ezagutzarekin ala gabe parte hartu daiteke, baita II. maila gaindituta edo antzeko ezagutzak edukita, konboaren kasuan.
Horrez gain, Maximo Moreno Musika Eskolak 14 urtetik gorakoentzako edo II. maila gaindituta dutenentzako tailerrak eskaintzen ditu, eta errefortzu eskolak erregimen arautura (kontserbatorioa) sarbidea egiteko probak gainditu nahi dituztenentzat.
Bestalde, ikasleen familiaren egoera ekonomikoaren arabera Galdakaoko Udal Musika Eskolan ikasten ari diren galdakoztarrek diru laguntzak eska ditzakete. Laguntza hauen helburua da «ikasle galdakoztarrek zerbitzua jasotzeko ordaindu behar duten prezio publikoaren zati bat konpentsatzea».
