Sormene
BINKE / 2020ko abendua

Miren Agur Meabe bigarrenez Sormenen, gaur «Nola gorde errautsa kolkoan» liburu berria aurkezteko

TESTUA ETA ARGAZKIA: Iñigo Larrea Labarrieta

Gaurko egunean zehar literatura uztartzen ari da Sormenen. Miren Amuriza eta Eider Eibarren aurkezpenaz disfrutatu ondoren, Miren Agur Meabek bere azken poesia liburua aurkeztu du: «Nola gorde errautsa kolkoan».

Bigarren eguna izan da gaurkoa Miren Agur Meaberentzat Sormenen. Asteartean Arkaitz Miner musikariarekin, errezitaldia eskaini zuen Leire Bilbao eta Lizar Begoñarekin batera. Bertan, bere azken poesia liburuko hainbat pasarte aurkeztu zituen, eta gaurkoan ere poesia liburua aurkeztera etorri da Galdakaora: «Nola gorde errautsa kolkoan». Azken hamarkadan idatzitako poemak bildu ditu azken liburu honetan, eta horregatik lanean zehar beste liburuei dagozkien zertzeladak agerikoak dira.

Duela zazpi urte «Kristalezko begi bat» eleberria idatzi zuen Meabek, geroztik eta beste hainbat obren artean, 2019an «Gezurren erretura» ipuin bilduma ere argitaratu zuen. Gaur aurkeztu berri duen poesiarekin hitzezko triptiko bat osatu du aurrean aipatutako bi liburuekin batera. Izenburutik hasiz, ondo laburtzen du liburuaren ildo nagusia, kolkoa bizitzako errautsak gordetzeko urna bilakatu baita askorentzat. Liburuko sarreran bertan hainbat galdera aurkezten dira, irakurlearegan hausnarketa pizteko asmoz, eta  horrekin, irakurlea poemetan garatuko den pentsamendua hasten da barneratzen hasierako gogoetaren bitartez.

Poesia liburuan bizitza kudeatzeko forma baikorra aurkezten da, obraren ondorio nagusia bizitzak dakartzan arazoei nork bere erara eutsi behar diela baita. Meabek Sormenen aipatu duenez, bere testuinguruko txokoak, animaliak etab. txertatu ditu liburuan sinbolismoa erakartzeko eta baita gogoeta sustatzeko. Elementu horiek batez ere obrako bigarren poeman aurkitu daitezke: «Kasandra optika». Nabarmentzekoa da poemek feminismoa ere jorratzen dutela zeharka, eta horren adierazle emakumezko protagonistak izango direla.

Eguneko laugarren saioari amaiera eman ondoren, literatura uztartzen jarraituko du Yolanda Arrietak, gaurkoan «Txokolategia» obra aurkeztera etorri baita Galdakaora. Horrekin batera, gogoratu Sormenek gaurko eta biharko saio guztiak streaming bidez emitituko dituela soilik eta Binkeren webguneko hasiera-orritik jarraitu ahal izango direla zuzenean.