Mugikortasun arazoak dituzten pertsonek behar dituzten tresnen bilketa martxan da Galdakaon
TESTUA: Irati Alonso García
ARGAZKIA: Sunrise Medical
Mugitzeko zailtasunak edo mendekotasuna duten pertsonei behar dituzten baliabideak errazteko helburuz Laguntza Teknikoen Bankuak egiten duen material bilketarekin bat egin du Galdakaoko Udalak. Bilketa martxan da abenduaren 15era arte eta hemen batu dugu parte hartzeko jakin beharrekoa.
Laguntza Teknikoen Bankuak mugitzeko zailtasunak dituzten pertsonek behar dituzten tresnak batzeko kanpaina jarri du martxan. Honen bitartez gurpildun aulkiak, ohe artikulatuak, garabiak, taka-takak, makuluak, mugimendu sentsoredun alarmak edo antzeko gailuak batzen dituzte ondoren behar dituztenen eskura jartzeko.
Galdakaoko Udalak kanpaina honekin bat egingo duela jakinarazi du eta erabiltzen ez dituzten tresnak dohaintzan emateko deia egiten die herritarrei. Honakoak dira jasoko diren tresnak:
- Etxean erabiltzekoak. Ohe artikulatuak, garabiak, koltxoiak eta higiene aulkiak…
- Etxean moldatzekoak. Eserleku birakariak, eskudelak, mugimendu sentsoredun alarmak…
- Mugitzen laguntzekoak. Gurpil aulkiak, taka-takak, makuluak…
- Zaintzaileentzakoak. Mobilizazio bandak, oinarri irristagaitzak, kuxin birakariak…
Tresnaren bat eman nahi izatekotan 94 440 91 16 telefono zenbakira deitu edo bat@butzatu.org helbidera idatzi behar da. Elkartea joango da jaso beharrekoak batzera eta berak egingo du materialen kudeaketa. Kanpainatik kanpo ere jasotzen dituzte gailuak.
