Komunikazio sareak
BINKE / 2021eko otsaila

Telegram aplikazioan kanal publikoa sortu du Binkek

Informazioaren eta abiaduraren garaian bizi garen honetan, Binkek Telegrameko kanala sortu berri du, gura dutenen eskura egon daiten. Kanal horretatik jasoko ditu, bertara batzen denak, Galdakaoko eta Usansoloko edukiak.

Informazioa zabaltzeko beste bide bati ekin dio Binke aldizkariak. Orain arte Facebook, Twitter, YouTube eta Instagrametik aritzen bazen ere Galdakaoren eta Usansoloren inguruko kontuak batzen, hemendik aurrera Telegram aplikazioaren bitartez ere gerturatuko da herrikidearengana.

Binkek presentzia duen sare sozialetan gure herrietako albisteak, elkarrizketak, iritziak, bideoak, erreportajeak eta bestelako edukiak argitaratzen dira, baina denetara joan behar duzu informazioaren bila sare sozial horretara —ez baduzu jakinarazpenen ezarpen propio bat jartzen—. Telegramekin aldiz, Binkek joan gura du zugana, eta aldizkari honen edukiak inork baino lehen bidaliko dizkizu patrikara mezu bidez.

Mezularitza aplikazio bat da Telegram, WhatsAppen antzekoa. Berez, telefonoan instalatzeko sortua da, baina ordenagailuetan ere instala daiteke. Mezuak elkarri bidaltzeko eta taldeak sortzeko aukera emateaz gain, Telegramek aukera ematen du kanalak sortzeko ere. Zer da hedapen kanal bat? Aldi berean erabiltzaile askorengana iristeko bide zuzen bat, WhatsAppeko talde bat izango balitz bezala, adibidez, baina desberdintasun nagusi birekin: edonor harpidetu daiteke doan kanalera baimenik eskatu gabe —horretarako jarri du Binkek publiko— eta bertara sartzen denak ez du ikusiko zein beste kide dagoen kanalean, eta bera dagoenik ere ez dute jakingo gainontzekoek.

Binkeren Telegram kanalaren informazioa jasotzeko, aplikazioa telefonoan instalatuta eduki behar da —eskuragarri dago Android, iOS eta Windows Phone telefonoetarako—. Gero, bi modu daude kanalari jarraitzen hasteko: Telegram aplikazioaren bilatzailean BINKE kanala bilatu eta jarraian kanalarekin bat egin, edo kanalera zuzenean eramango zaituen estekan klikatu eta kanalera sartu: t.me/binke_aldizkaria