Umore Ona B talde usansolotarrak Lurraldeko 2. Mailara igoera lortu du
TESTUA: Irati Alonso García
ARGAZKIA: Umore Ona
Zapatuan, ekainak 14, denboraldiko azken partida jokatu zuen Umore Ona B talde usansolotarrak eta 0-0 berdindu zuen Union Sporten kontra. Emaitza honi esker, Lurraldeko 2. Mailan jokatuko dute hurrengo denboraldian.
Ligan lortutako emaitza onei esker, Umore Ona B talde usansolotarrak Bizkaiko Lurraldeko 2. Mailara igotzeko sailkapen fasea jokatu du. Zapatuan, ekainak 14, izan zen fase honetako azken partida eta emaitza 0-0 izan zen, Union Sport taldearen aurka.
Garaipena lortu ez arren, aurretik izandako emaitzei esker Lurraldeko 2. Mailara igoera lortu zuen Umore Ona B taldeak partida honekin.
Klubak taldea zoriondu du, eta Usansoloko Udalak ere: «Lorpen honek talde teknikoaren eta jokalari guztien lana, konpromisoa eta dedikazioa islatzen ditu, eta are bereziagoa da gure herriarentzat, taldeko jokalari asko txikitatik ikusi ditugulako klubean. Gure herrian hazitako gazteak klubaren koloreak defendatzen eta arrakasta lortzen ikustea harrotasun iturri handia da guztiontzat. Eskerrik asko klubari, batez ere gazteen artean, kirola, adiskidetasuna eta gainditze espiritua sustatzen jarraitzeagatik. Igoera hau eguneroko lanaren fruitua dela erakusten duen adibide argia da».
