Usansoloko erdigunean Metro geltokia eskatzeko manifestazioa egin zuten atzo
TESTUA: Irati Alonso García
ARGAZKIA: Naiara Pérez de Villarreal
Ehunka auzokide batu ziren atzo Usansolon, herriaren erdigunean Metro geltokia eskatzeko manifestazioan. Unkina plazatik irten ziren eta kaleak zeharkatu zituzten, 5. linearen proiektu berrian egungo tren geltokia kenduko dela salatuz.
Metroaren 5. linearen proiektu berrian egungo Usansoloko tren geltokia kenduko dutela salatu dute behin eta berriz auzokideek. Pasa den urrian Eusko Jaurlaritzak proiektua aurkeztu zuenetik, erdigunean geltokirik gabe geratuko direla azaldu dute usansolotarrek.
Auzokideen kexetara hainbat elkarte batu dira, Usansoloko erdigunean metro geltokia eskatuz. Hauek izan dira atzo antolatu zen manifestaziorako deia egin zutenak.
Hain zuzen, ehunka pertsona batu ziren atzo Usansoloko kaleetan zehar egin zen manifestazioan. Unkina plazatik hasitako ibilbidean, «geltoki zentriko bat basbesteko eta aldarrikatzeko» batu ziren.
