Usansoloko ospitaleko Metro geltokia eta erdigunea arrapala mekanikoekin batzea proposatu du Jaurlaritzak
TESTUA: Irati Alonso García
ARGAZKIA: iStock
Usansoloko erdigunean Metro geltokia eskatzen jarraitzen dute auzokideek eta Eusko Jaurlaritzak hau baztertu duen arren, Metroa erdigunera hurbiltzea proposatu du. Ospitaleko geltokitik herriaren erdigunera arrapala mekanikoak jarriz egingo litzateke.
Geltokia Erdigunean plataformak eta auzokideek Usansoloko erdigunean Metro geltokia eskatzen jarraitzen dute. Plataformaren esanetan, «orain arte emandako alternatibak ez dira nahikoak eta Metroaren 5. linearen proiektuan Usansoloko erdigunean geltokia ezartzea da konponbidea».
Eusko Jaurlaritzak eta Euskal Trenbide Sareak aukera hau baztertu zuten hasieratik eta usansolotarren eskaerak kontuan hartzeko helburuz, alternatibak aztertzea eskatu zieten Eusko Legebiltzarrak eta Bizkaiko Batzar Nagusiek.
Sener enpresak egin zuen urte hasieran argitaratutako azterketa eta honetan batu zena kontuan hartuta, hauxe erabaki zuen Eusko Jaurlaritzak: arrapala mekaniko baten bitartez batzea ospitaleko geltokia eta Usansoloko sarrera, eta aldi berean lanzadera bat jartzea herriko sarreratik erdigunerainoko ibilbidea osatzeko.
BINKEk jaso zuen moduan, lanzaderak ibilbide zirkularra egingo luke zortzi minuturo, hiru geltokirekin: Metro geltokia, Pertxin Bidea eta N-240 errepidea, Gorosibain.
Usansolotarrak alternatiba honen kontra agertu dira ere eta horregatik, beste aukera bat proposatu du orain Eusko Jaurlaritzak. El Correo egunkariak argitaratutako informazioaren arabera, arrapala mekanikoen bitartez lotuko lirateke ospitaleko geltokia eta Usansoloko erdigunea zuzenean. Arrapala hauek hau aireportuetan aurkitu daitezkeenen antzekoak izango lirateke, eta 80 metroko bost zati izango lituzkete.
Eusko Jaurlaritzak proposatutako lehen aukerak, lanzaderarenak, 16,8 milioi euroko inbertsioa izango luke eta azken honek ordea, 19,4koa.
El Correok azaldutakoaren arabera, Jaurlaritza hurrengo asteetan batuko da Usansoloko Udalarekin eta baita auzokideekin ere, bi aukerak azaldu eta «guztiontzako onena den erabakia hartzeko».
