Usansoloko Udala maiatzaren 4an eratuko da
TESTUA: Irati Alonso García
ARGAZKIA: Google Maps
Usansoloko Udalaren funtzioak egingo dituen kudeaketa batzordea maiatzaren 4an eratuko da Txapelena baserrian, Bizkaiko Foru Aldundiak iragarri duenez. Batzordeak Usansolo Herria plataformako zortzi kide eta EAJko hiru izango ditu.
Bizkaiko Foru Aldundiak Usansoloko kudeaketa batzordea izendatzea onartu du gaur, apirilak 25, Gobernu Kontseiluan, Bizkaiko Lurralde Mugapeei buruzko 9/2012 Foru Arauak xedatzen duen bezala. Batzordeak Usansoloko Udalaren funtzioak egingo ditu eta guztira hamaika kide izango ditu.
Zehazki, Usansolo Herria plataformako zortzi kidek eta EAJko hiruk osatuko dute batzordea, Hauteskunde Batzorde Zentralak 2019ko maiatzaren 26ko udal-hauteskundeetako emaitzetan oinarrituta igorritako ziurtagirian jasotzen den bezala.
Kudeaketa batzordea maiatzaren 4an eratzea ere adostu du gaur Bizkaiko Foru Aldundiak. Usansoloko Txapelena baserrian izango da 19:00etan eta bilkura horretan batzordeburua ere hautatuko da.
Momentuz Usansolo Herriaren kideak ezagutzen dira soilik. Binkek jaso zuen moduan, hauek izango dira plataformak kudeketa batzordean izango dituen ordezkariak: Diego Ortega, Enrique Barrenetxea, Javier Aurrekoetxea, Alvaro Ruiz, Jose Angel Garcia, Julen Urgoiti, Maria Angeles Barañano eta Agustin Aizpuru.
