Zimitz kirasdunak osasunerako arriskurik ez dakarrela gogorarazi du Galdakaoko Udalak
TESTUA: Irati Alonso García
ARGAZKIA: Galdakaoko Udala
Galdakaoko hainbat lekutan agertzen ari da zimitz kirasduna eta herritarrak kezkatzen hasi dira. Honen aurrean, Udalak azaldu du espezie honek ez dakarrela ez pertsonen ez animalien osasunerako arriskurik.
Hainbat txokotan agertzen ari da Halyomorpha halys zimitza, zimitz kirasduna bezala ezagutua. Galdakaon ere ageri dira eta jendea kezkatzen hasi denez, Udalak gogorarazi du espezie honek ez dakarrrela ez pertsonen ez animalien osasunerako arriskurik.
Zimitza kirasduna landarez elikatzen den zimitz espezie bat da eta mehatxupean dagoenean, usain handi eta desatsegina botatzen du defentsa-mekanismo gisa. Udazkenean, hibernatzen hasten dira eraikinetan, eta horregatik detektatu da infestazioa.
Udalak Bizkaiko Foru Aldundiarekin eta normalean lan egiten duen izurrien kontrolean espezializatutako enpresarekin kontsultatu du, eta «biak bat datoz intsektu horren kontrola ez dela erraza esatean». Enpresak adierazi du «osasunerako kaltegarriak ez direnez, oraingoz ez dela gomendagarria ezta eraginkorra eremu irekietan modu masiboan fumigatzea».
«Etxeko intsektizidak ere ez dira eraginkorrak eta gomendioa barrera fisikoak jartzea da; zuloak silikonarekin estaltzea eta leiho zein ateak babestea zimitzak etxebizitzara sar ez daitezen», adierazi dute Udaletik.
Espezie horren ugaritzeak azken urteko baldintza klimatologikoetan izan dezake jatorria, landaredia-eremuetan ugalketa esponentziala bultzatu baitu ez ohiko eguraldiak. Negu giroa iritsi ahala, «eragozpenak desagertzen joango dira».
Gogorarazi dute, herritarrei eragozpenak sortu eta laborantzan eragin ditzakeen arren, «intsektu horiek ez dutela arriskurik pertsonen eta animalien osasunerako».
