Arropa eta jostailu bilketa hasi du Aperribaiko Auzo Elkarteak
TESTUA: Jon Gomez Garai
ARGAZKIA: Jabi Rojo, Binkeren artxibotik
Neguari aurre egiteko eta Gabonetan opariak jaso ahal izateko arropa eta jostailu bilketa martxan jarri dute Aperribaiko bizilagunek, eguaztenero Eperlandako eskolan. Antolatzaileekin hitz egin du Binkek eta informazio gehiago jaso.
Urtaro aldaketek, bereziki udaren eta neguaren atarietan, «armairu aldaketa» dakarte beraiekin: udako arropak gorde eta negukoak eguneroko apaletan jartzea, edo alderantziz. Lan horretan, baina, asko dira balio ez zaizkigun edo dagoeneko erabili gura ez ditugun arropak, «baina askorentzat erabilgarri izan daitezkenak», diote Aperribaiko Auzo Elkartetik.
Horregatik, eta horri Gabonak ere ate joka ditugula kontuan hartuta, bereziki beharrizan handienak dituzten familia eta umeentzako arropa eta jostailu bilketa kanpaina hasi du aipatutako auzo galdakoztarreko elkarteak.
«Guk berez urte osoan dugu Armairu Solidarioa —horren berri eman zuen Binkek iazko abenduko erreportaje nagusian— eta asko dira laguntza sareak ehuntzeko ditugun ekimenak, baina neguari eta Gabonei begira kanpaina berezi hau jarri dugu martxan, erabiliko ez ditugun neguko arropa eta jostailuak bertara ekartzeko», kontatu diote Aperribaiko Auzo Elkartetik Binkeri.
Emateko zein jasotzeko interesa duenak, Eperlandako eskolara hurbiltzea baino ez du: eguaztenero 17:00etatik 19:00etara bitarte eta urtarrilera arte. Informazioa gura izanez gero berriz, 635573397 telefono zenbakira deitzea baino ez dago.
