Maialen Lujanbio eta puntako beste bost bertsolari izango dira barikuan Galdakaon
TESTUA: Irati Alonso García
ARGAZKIA: Bertsozale Elkartearen sareetatik
Bertsolari Txapelketa Nagusiko finala ospatu zen pasa den domekan Iruñean, Maialen Lujanbiok jantzi zuela txapela. Barikuan Torrezabalen saioa eskainiko du bertsolariak 20:00etatik aurrera Nerea Ibarzabal, Jone Uria, Aitor Mendiluze, Unai Iturriaga eta Joanes Illarregirekin batera.
Euskal Herriko txoko guztietako bertsozaleak bildu ziren pasa den domekan Iruñeko Nafarroa Arenan Bertsolari Txapelketa Nagusiko finala ikusteko. Zortzi bertsolarik parte hartu zuten eta horietatik Amets Arzallus eta Maialen Lujanbio sailkatu ziren buruz burukoa lehiatzeko. Azkenean Lujanbiok eraman zuen irabazlearen txapela etxera.
Iruñean bizitakoa memorian duela, Galdakaon izango da Lujanbio barikuan, abenduak 23, bertsoak botatzen punta puntako beste sei bertsolarirekin batera. Aurtengo Bertsolari Txapelketa Nagusian parte hartu duten Nerea Ibarzabal eta Aitor Mendiluze izango dira saioan, eta baita Jone Uria, Unai Iturriaga eta Joanes Illarregi.
Arkaitz Estiballes galdakoztarra izango da gai jartzailea, «mailarik goreneko jaialdia, ohiko bihurtu den Gabon inguruko saioa» zuzenduko duela.
Bertso-jaialdia Gabonetako egitarauaren barruan antolatu du Galdakaoko Udalak eta Torrezabalen izango da barikuan, arratsaldeko 20:00etan. Sarrerak salgai daude Torrezabalen eta webgunean 6 euroko prezioan.
