Adin guztiei zuzendutako bost ikuskizun hartuko ditu Torrezabalek otsailera bitarte
TESTUA: Irati Alonso García
ARGAZKIA: Kulturklik
Urtarrila eta otsailean zehar adin eta zaletasun guztiei zuzendutako bost saio ikusteko aukera izango da Torrezabal Kultur Etxean. Besteak beste, Aitziber Garmendia protagonista duen ‘Ez naiz inoiz Dublinen egon’ antzezlana eta haurrentzako ‘Esna’ musika ikuskizuna eskainiko dira aretoan.
Behin Gabonak atzean geratu direla, Torrezabal Kultur Etxeak ume eta nagusiei zuzendutako ikuskizunak eskainiko ditu. Urtarrila eta otsailean zehar, antzerkiak, musika eta umorea uztartzen dituzten bost saio ikusteko aukera izango da Galdakaon.
Hilaren 28an arratsaldeko 18:00etan Mar Mar Teatrok ‘Arrainak bihotzean’ antzeztuko du euskaraz Getari Etxegarairen zuzendaritzapean. Umeentzako ikuskizun honek Martinaren bidaia du oinarritzat, itsas-hondoan hasten dena aita aurkitzeko asmoz. Bidean, arrainen eta beldurraren hizkuntza ikasi beharko du.
Otsailean sartuta, 10ean Aitziber Garmendia helduko da Torrezabalera. Aktoreak umorea nagusi duen ‘Ez naiz inoiz Dublinen egon’ euskarazko antzerkia eskainiko du Iñigo Aranburu, Iñigo Azpitarte eta Mireia Gabilondorekin batera 20:00etan.
Hurrengo astean, 19an 18:00etan hain zuzen, Marie de Jongh eta Doos Colectivo konpainiek ‘Esna’ aurkeztuko dute Galdakaon. Ikuskizuna haurrei zuzenduta dago ere eta musika eta mugimenduaren bitartez pertsonek beren gorputzekin edo irudimenarekin esperimentatzeko duten gaitasuna balioan jartzen du.
Emakumeek historian zehar izandako papera ezagutzeko aukera izango da ere Torrezabalen. Otsailaren 25ean 20:00etan ‘En palabras de Jo… Mujercitas’ antzezlanak Louisa May Alcotten lan ospetsuaren idazketa prozesua eskainiko du, ondorengo belaunaldietako hainbat emakumerengan eragin handia izan duena.
Azkenik, Galdakaoko Musika Banda Da Capo, El Gran Rufus eta Ana Fernándezek familiei zuzendutako ‘Zirku Soinua!’ kontzertua aurkeztuko dute Torrezabalen otsailaren 26an 13:00etan. Kolore eta alaitasun artean, zirku batean jaio den Felipe gaztearen bizitza ezagutzera emango dute.
Saio guztietarako sarrerak eskuragai daude Torrezabal Kultur Etxean eta aretoaren webgunean. Halaber, azken honetan ikuskizunetako informazio gehiago ezagutu daiteke.
