Sagardotegira irteera antolatu du Zizpak martxoaren 25erako

TESTUA: Irati Alonso
ARGAZKIA: Donostia Turismoa

Azken urteetan bezala, Zizpa Gazte Konpartsak sagardotegira irteera antolatu du, kasu honetan martxoaren 25erako. Usurbilgo Arratzain sagardotegira joatea proposatu du taldeak eta tiketak salgai jarri ditu jada 50 euroko prezioan.

Gazteen arteko elkarbizitza sustatzeko helburuz, hainbat ekintza antolatu ohi ditu Zizpa Gazte Konpartsa galdakoztarrak. Azken urteetan bezala, oraingoan ere sagardotegira irteera proposatu dute, kasu honetan martxoaren 25ean.

Usurbilgo Arratzain sagardotegira joateko aukera eskaintzen dute aurten. Horretarako, autobusak jarriko dituzte Galdakaotik. Zehazki, goizeko 11:00etan irtengo dira eta buelta 03:30etan izango da Hernanitik, bazkalostean hor jarraituko baitute parranda.

Zizpak jakinarazi duenez, tiketak salgai daude jada Herriko Bentan, Zurruten eta Oñarten 50 euroko prezioan. «Pasa dan urtean oso arin amaitu ziren sarrerak beraz, azkar ibili!», adierazi dute taldetik.

Elikadura beharrizanik izatekotan edo informazio gehiago ezagutzeko, Zizparen Instagram kontura idatzi edo 681168983 telefonora deitu daiteke.