Iñigo Hernando (EH Bildu): «Bizi kalitatea hobetzeko urrats sendoak eman ditugu»
TESTUA: Irati Alonso García
ARGAZKIA: Binke
Maiatzaren 28an antolatuko dira foru- eta udal-hauteskundeak Hego Euskal Herrian. Galdakaon bederatzi alderdi aurkeztuko dira eta kanpainan murgilduta daude honezkero, herritarrei haien programa azaltzeko ekitaldiak antolatzen. Alderdi bakoitzaren zerrendaburua hobeto ezagutzeko helburuz, galdera batzuk labur erantzuteko gonbitea egin die Binkek alkategai guztiei. Oraingoan Iñigo Hernando EH Bilduko alkategaiaren txanda izan da.
Zein balorazio egiten duzu azken legegintzaldiaz? Balorazio positiboa egiten dut: proiektu gehien gauzatu den legegintzaldia izan da hau. Herriak hoberuntz egin du. Pandemiak gogor jo zuen, eta, hala ere, galdakoztarron bizi kalitatea hobetzeko urrats sendoak eman ditugu: kultur programazioa bikoiztu egin dugu, kale asko eta argiteria berritu ditugu, igogailuak eta arrapalak eraiki dira, herrian lehen aldiz alokairu baxuko etxebizitzen proiektua martxan jarri dugu… Aldaketa nabaria da, eta Galdakao merezi dugun tokira eramaten ari gara.
Zergatik aurkeztu zara alkate izateko? Herritarrek gure taldean jarri zuten konfiantza 2019an, eta, orain, EH Bilduren oinarriek eta herritar askok, kolore politikoetatik haratago, berriz aurkezteko eskatu didate. Ohorez, erantzukizunez eta indarrez onartzen dut gure herria hobetzeko lanean jarraitzeko erronka.
Zergatik eman behar dizute botoa herritarrek? Galdakao geldiunetik atera eta martxan jarri genuen. Ezin gara atzera itzuli. Denon artean, hasitako bideari jarraipena eman behar diogu.
