Usansoloko Udalak lokal berriak erosi ditu, bere jarduerarako

TESTUA: Irati Alonso García
ARGAZKIA: Google Maps

Usansoloko Udala martxan jarri zenetik pausoak eman ditu pixkanaka eta orain lokal berriak erosi ditu, bere jarduerarako. Erosketaren aurrekontua 650.750 eurokoa izan da eta  lokalak Arlo Baltza Plaza eta Pertxin Bidea arteko eraikuntzan daude kokatuak.

Bizkaiko 113. udalerria da Usansolo iazko abendutik eta ospakizunen osteko hurrengo pausoa Udala eratzea izan zen. Zerotik hasi behar izan zuen bidea Usansoloko Udalak eta pixkanaka-pixkakana erabakiak hartzen joan da, «usansolotarren beharrak asetzeko asmoz», BINKEk jaso zuen moduan.

Besteak beste, izapideak online egitea ahalbidetzen duen webgune berria jarri du martxan, Usansolon zerbitzuak mantetzeko akordioa sinatu du Galdakaoko Udalarekin eta umeentzako udalekuak antolatu ditu.

Orain beste pauso bat eman du Usansoloko Udalak eta lokal berriak erosi ditu bere jarduerarako.  Lokalak Arlo Baltza Plaza eta Pertxin Bidea arteko eraikuntzan daude kokatuak eta, orotara, 710 metro karratu izango dituzte.

Hauetarako inbertsioa 650.750 eurokoa izan da eta  berritze lanen ostean bertan izango dira udal administrazioaren bulego eta espazio guztiak.

«Etorkizunean udaletxeak beste espazio bat izango balu, lokal horiek bestelako udal erabilera batera bideratuko lirateke», adierazi dute Udaletik.