Kirola
BINKE / 2021eko martxoa

Emakume pilotarien taldea sortu gura dute Usansolon

TESTUA: Jon Gomez Garai
ARGAZKIA: Ainara Navarrok bidalita

Usansolon emakume pilotarien talde bat sortu gura dute, eta horretarako deialdia egin dute herriko pilota elkartearen laguntzaz. Izena emateko, ez da ez adin ezta maila zehatzik ere izan behar.

Ainara Navarro eta Oihana Laresgoiti usansolotarrek Larrabetzuko frontoian ezagutu zuten elkar, Txokoan pilota elkartearen bitartez jokatzen ari zirela. «Eta han jokatzen gagozala konturatu ginan guri herrian jokatzea gustatuko jakula, Usansolon», esan diote pilotariek Binkeri. Horrela ba, Usansoloko pilota elkarteari laguntza eskatu eta eurekin ari dira emakume esku-pilotarien talde berria sortu guran.

Taldea sortzeko baina, pilotariak eta pilotazaleak behar dituzte lehenago. Eta horretan edonork eman dezake izena, sortzaileek ere argi dutelako: «Emakume guztiak izango dira ondo etorriak». Berdin die adinak zein jokatzeko mailak, norberak duen erritmoan eta nibelean jokatuko duelako emakume pilotarien talde berri honetan, «eta gure helburua elkarrekin jokatzea eta ikastea delako».

Gainera, Binkeri kontatu diotenaren arabera, emakume pilotarien talde honek berehala entrenatzen hasteko aukera izango du, «martitzen eta eguen arratsaldeetan Unkina kiroldegiko frontoia guretzako gorde dabe». Horrela ba, hasteko, astean bi orduz eta entrenatzaile batekin entrenatzeko aukera izango dute.

Eman izena!
Taldean izena eman gura duenak edo zalantzak argitu nahi dituenak, 620779645 edo 687783367 telefonoetara deituta edo idatzita egin dezake.