Rara liburua aurkeztu zuen atzo Irati Bediaga galdakoztarrak Sestaoko Con Eco dendan, Durangoko Azokaren egitarauaren baitan antolatutako hitzorduan. Idazlearen laugarren lana da eta ipuin ezberdinez osatuta dago.
Duela bi hilabete inguru BINKEk primizian argitaratu zuen moduan, laugarren liburua kaleratu du Irati Bediaga Rementeria idazle galdakoztarrak: Rara. Barikuan, azaroaren 28arekin, aurkeztu zuen jendaurrean.
Durangoko Azokaren ‘Zu Non, Han DA!’ egitasmoari esker, Azokan bertan eskuragarri egongo diren liburu berrien aurkezpenak egiten ari dira Euskal Herri osoko 19 dendatan. Ekimena 2020an hasi zuen antolakuntzak, baina lehenbiziko aldiz ari dira liburu berrien aurkezpenak Durangoko Azokaren aurretik egiten. Marko horren barruan antolatu zen Irati Bediagaren Rara liburuaren aurkezpena.
Jendaurreko lehenengo aurkezpena Sestaon egitea egokitu zitzaion galdakoztarrari, eta Con Eco dendan solasaldia eskaini zuen Bediagak Jon Gomez Garai herrikide eta BINKEko kideak gidatuta. Solasaldi goxoa eskaini zuten bi galdakoztarrek, bertaratutakoen parte hartzea ere sustatuta.
«Ni edo nire ingurukoak arraro sentiarazten gaituzten gauzen inguruko ipuinak dira, batzuk oso literarioak eta beste batzuk oso gordinak», azaldu zuen Bediagak liburuaren aurkezpenean, eta «normaltasuna sistemaren beste gezurtxo bat» dela azpimarratu.
Aurretik argitaratu dituen hiru lanekin alderatuta —Beldarraren hegaldia (Elkar, 2013), Etxetik ospa (Elkar, 2021) eta Kaleko artista (Ibaizabal, 2022)— Rara liburu «helduagoa» da, bereziki nerabeei zuzendutakoa, eta idazleak nabarmendu bezala «nire beldur zein konplexuen armairutik irten izanaren ondorio garbia».
Elkar argitaletxearekin kaleratu du Irati Bediagak 20 pasartez osatutako liburu berria eta dagoeneko salgai dago Euskal Herriko liburu-dendetan, 14 euroko prezioan.
