Ekonomia
BINKE / 2022ko otsaila

Astelehenean aurrekontu parte-hartzaileetako taldea osatu gura du Udalak

ARGAZKIA: Jason Goodman
TESTUA: Naia Bergaretxe Sarria

Datorren astelehenean, otsailak 21, aurrekontu partida bat zertara bideratu erabakiko duen talde eragilea osatu gura du Udalak, eta horretarako 16 urtetik gorako herritarrei egin die deia. Hemen batu ditugu lehenengo hitzordua eta taldean izena emateko bideak.

Aurrekontuen zati bat zertara bideratuko den herritarren artean erabakitzea Galdakaoko Udalak urteetan martxan jarri duen ekimena izan da, eta 2023-2024koak ere horrela egin gura ditu herriko erakundeak. Horretarako lehenengo bilera astelehenean egin gura du, eta herritarrei parte hartzera deitu die Udalak.

«Lehen urratsa, aurreko edizioetan bezala, talde eragile bat sortzea da, herritarrek eta Parte-hartze eta Ogasun arloek elkarrekin lan egin dezaten, prozesuaren hasieratik bertatik gardentasuna eta parte hartzea bermatzeko», adierazi du erakundeak ohar bidez, eta talde eragile hori sortzeko 15 herritar gura dituela adierazi.

Horretarako, interesa duen 16 urtetik gorako herritarrei talde honetan parte hartzeko deia egin die, aurretik izena emanda. Izena eman gura duenak bi bide izango ditu horretarako: telefonoz edo e-mailez.

Parte hartzeko

• Telefonoz: 688 830 479 zenbakira deituta edo mezu bat bidalita —bai WhatsAppez zein Telegram bidez—.
• E-mail bidez: partaidetza@galdakao.net helbidera mezu elektronikoa bidalita.
  * Leku libreak baino eskaera gehiago egonez gero, plazak zozketa bidez banatuko dira, betiere zonalde eta genero oreka kontuan hartuta.

Lehenengo saioa astelehenean izango da, otsailak 21, Gandasegi eskolako aretoan 19:00etan hasita.