Galdakaoko alkateak, EH Bilduk eta PSE-EEk euren babesa adierazi diete Maxameko langileei
Greba mugagabea
BINKE / 2022ko otsaila
Galdakaoko alkateak, EH Bilduk eta PSE-EEk euren babesa adierazi diete Maxameko langileei
TESTUA: Jon Gomez Garai
ARGAZKIA: Aitzol Zamalloa
Lehergaien enpresako langileen gehiengo zabala greba mugagabean hasteak atea ireki die alderdien erreakzioei ere. Euren babesa adierazten lehenak EH Bildu eta PSE-EE izan dira. Alkateak ere «Udalaren babes osoa» erakutsi die langileei manifestazioa Kurtzeko plazara iristean.
Urtebete luzeko barne-krisiak eztanda egin ostean atzo hasi zuen Maxameko langileen gehiengo zabal batek greba mugagabea. Urte honetako ibilbidean Binke —beste hedabide gutxi batzuekin batera— borroka honen nondik norakoak kontatzen joan da, baina greba mugagabeak ireki die atea alderdien erreakzioei.
Greban dauden lehergaien enpresako langileei babesa adierazten lehenak EH Bildu eta PSE-EE alderdiak izan dira; lehenengoak atzo egin zuen, greba hasi eta berehala, eta alderdi sozialistak gaur egin du publiko bere elkartasuna langileekin. Biek sareen bidez egin dute.
Koalizio abertzaleak «bere lanpostuen defentsan, greba mugagabea hasi duten langileei gure elkartasuna» adierazi zien atzo bi hizkuntzetan. Galdakaoko PSE-EE urrunago joan da gaur gaztelaniaz argitaratutako txioan, elkartasuna adieraztearekin batera «euren lanpostuen defentsan langileen esanetara» daudela adierazita.
Gainera, gaur —otsailak 17— egindako manifestazioan Iñigo Hernando alkateak manifestazioan ziren lagunak hartu ditu Kurtzeko plazara iristean, eta «euren babes osoa» erakutsi die udaletxearen atarian, ondoko berbekin: «Enpresa historiko hau oso-oso garrantzitsua da Galdakaorentzat eta beraz uste dogu Udala euren (langileen) alboan egon behar dala».
