Kirola
BINKE / 2022ko martxoa

Kurtzeko frontoia aurretik hitzordurik eskatu gabe erabili daiteke

TESTUA: Naia Bergaretxe Sarria
ARGAZKIA: i3 estudioa

Adiskide eta Orma Bi pilota elkarteen ohiko entrenamenduetatik eta Gandasegi eskolaren Heziketa Fisikoko klaseetatik kanpo, Kurtzeko frontoia libre dagoen guztietan erabili ahal izango da pandemia aurreko garaietan bezala: aurretik hitzordurik eskatu barik.

Pandemia aurreko arauetara itzuli da gaur Kurtzeko frontoia. Lehen, aurretik hitzordua eskatu behar zuen erabiltzaileak libre zegoenean ere, argia izan eta ateak ireki ahal izateko. Gaurtik aurrera ordea, libre dagoenean erabil daiteke, aurretik hitzordua eskatzeko beharrik gabe.

Galdakaoko Udalak ohar bidez azaldu du hala erabiltzen zela frontoia pandemiaren aurretik, «baina, Covid-19ari aurre egiteko hartu ziran neurrien ondorioz, aurrez hitzordua hartu behar izan da azken bi urteotan». Eta gaineratu: «Neurri murriztaile gehienak bertan behera uzten ari diren honetan, ez ohiko tramitazio hori ere bertan behera geratu da».

Herriko erakundeak gogorarazi egin du, edozein kasutan, frontoia ohiko entrenamenduetarako zein partidatarako erabiltzen duten Adiskide eta Orma Bi elkarteek «lehentasuna» dutela. Baina baita Gandasegi eskolak ere, Heziketa Fisikoko orduetarako.

Ordutegi horietatik aparte, frontoia libre dagoenean, herritarrek erabili ahal izango dute.