Gazteria
BINKE / 2022ko martxoa

Lamintxu ez da desagertuko, erreleboa baitago

TESTUA: Naia Bergaretxe Sarria
ARGAZKIA: Lamintxu Gazte Asanblada

Lamintxu Gazte Asanbladak jende berri eske bideoa argitaratu zuen martxoaren 10ean, taldearen desagertzeaz ohartaraziz bestela. Bada, bideoaren eraginez eta domekako herri erakusketan, 20 gazte inguru gerturatu dira taldera. Dena ondo bidean, Lamintxuk aurrera jarraituko du.

Usansoloko Lamintxu Gazte Asanblada orain dela 15 urte sortu zen, urtero gazteriarentzako hainbat ekintzak antolatu gurean eta «herriko kaleak piztu» nahian. Martxoaren 10ean talde honek bideo bat publikatu zuen bere Instagrameko kontuan gazteriaren arreta eske.

Bideo horretan azken urteetako Lamintxuko kideek azaltzen zuten urte asko izan direla kide berdinak guztia antolatzen lanean ibili direnak, eta heldu dela momentua erreleboa belaunaldi berriei emateko. Gazte berririk ez bazen taldean sartzen Lamintxu desagertu egingo zen.

Taldekide batzuek urte askoren ostean Lamintxu utziko dute —horietako batzuk UJABA (Usansoloko Jai Batzordea) taldera pasatuko direlako— eta antolatzen dituzten ekintza guztiak galdu ez daitezen, jende berria behar dutela iragarri zuten. «Denok eman behar dugu zerbait, gutxi batzuk dena eman ez dezaten», hori izan zen bukatzeko eman nahi izan zuten mezua, eta interesatuak haiekin Instagram bidez edo ezagunen bidez kontaktuan jartzeko eskatu zuten.

Bideoaren harira, Usansoloko 20 gazte baino gehiago jarri dira kontaktuan taldearekin eta asteburu honetako Desanexio Jaiaz baliatuz, herri erakusketan, Lamintxuk bere gunetxoan Instagramen publikatutako bideoa izan zuen presente, interesatuta dauden pertsona horiek erakartzeko.

Esan eta egin. Elkarteko kideek gazteak erakartzea lortu du eta ondorioz litekeena da Lamintxu Gazte Asanbladak bere bidea jarraitzea, desagertzeko beharrizanik gabe.

Aurretik egon ziren sei kideekin batera, etorri berriek Lamintxuren orain arteko ekintza antzekoak jorratzen jarraitu beharko dute, eta noski, berriek ekarpen berririk ere ekartzekotan, horiek ere egiteko prest egongo da taldea. Orain arte Gazte Eguna, kuadrilen jaitsiera, lehiaketak, jaietako txosna… kudeatu edo jarri ditu martxan talde honek.