Eider Murgia galdakoztarra, hirugarren Espainiako crossfit txapelketa ezagunenean
TESTUA: Jon Gomez Garai
ARGAZKIAK: Madrid Championship
Espainiako crossfit txapelketarik ezagunenean izan da parte hartzen Eider Murgia galdakoztarra irailaren 9tik 11ra bitarte, Madrilen, eta hirugarren postua eskuratu du bere kategoriako 177 talderen artean. Zorionak!
Espainiako crossfit txapelketarik ezagunenean aritu da Eider Murgia galdakoztarra irailaren 9tik 11ra bitarte, Madrid Championship crossfit txapelketa ofizialean, eta hirugarren postua ekarri du galdakoztarrak etxera.
Madrileko Caja Mágica estadioan —besteak beste, teniseko Madrid Open masterrak jokatzen diren estadio berean— antolatu da, beste urte batez, Madrid Championship crossfit txapelketa. Crossfit entrenamendu-teknika bat da, hainbat diziplinatako mugimenduak lotzen dituena, hala nola halterofilia, entrenamendu metabolikoa edo gimnastikoa. Ariketa-programa bati ekitean datza —flexioak, trakzioa, etab.—, denbora jakin batean eta aldi kopuru zehatz batekin.
Bada, txapelketa ezagun honetan hartu du parte Eider Murgia galdakoztarrak, eta bere kategorian —«sala intermedio» deritzon horretan— 177 taldek hartu du parte aurtengo edizioan. Guzti horietatik, hirugarren postua eskuratu du Murgiak bere taldearekin. Talde bakoitza lau kidekoa izan behar zen, hiru mutilek eta neska bakarrak osatutakoa, eta galdakoztarrak Barakaldoko beste hiru mutilekin hartu du parte Espainiako txapelketa honetan. Domina eta txapelketako zenbait produktu ekarri ditu Galdakaora opari.
