Autismoa eta inklusioari buruzko ipuin lehiaketa jarri du martxan Galdakao TEAyuda elkarteak

TESTUA: Irati Alonso García
ARGAZKIA: Eres Mamá

Galdakao TEAyuda elkarteak ‘Asmatu denok bereziak garen mundu bat’ ipuin lehiaketa abiatu du. Autismoa eta inklusioari buruzko kontakizunek parte hartu dezakete txapelketan eta otsailaren 25era arte bidali daitezke.

Autismoa agerian jarri eta herritarrak honen inguruan sentsibilizatzeko lan egiten du Galdakao TEAyuda elkarteak. Horretarako hainbat ekintza antolatzen ditu urtean zehar eta oraingoan ipuin lehiaketa jarri du martxan.

Txapelketak ‘Asmatu denok bereziak garen mundu bat’ izena du eta autismoaren eta inklusioaren inguruko kontakizunek parte hartu dezakete. Euskaraz edo gaztelaniaz bidali daitezke eta horretarako epea zabalik dago otsailaren 25era bitarte. Lehiaketaren oinarriak eta informazio gehiago eskatu daitezke infogaldakaoteayuda@gmail.com helbidera idatziz.

Elkarteak adierazi duenez, sariak egongo dira alde batetik 7 eta 16 urte arteko parte-hartzaileen artean, eta bestetik 16 urte gorakoentzat.