Politika
BINKE / 2022ko ekaina

Bizkaiko zenbait talde independente Galdakaon batu ziren ekainaren 8an

TESTUA: Erredakzioa
ARGAZKIA: Miguel Angel Martín

Bizkaiko talde independenteen bigarren bilera Galdakaon egin zuten ekainaren 8an, «ikusgarritasun gehiago» eskatzeko, hauen «kudeaketa ona» balioan jartzeko eta Eusko Jaurlaritzaren Ingurumen Administrazioaren legearen aurka egiteko, besteak beste.

Bakoitzaren udaletik politika egiteko sortu ziren talde independenteak bigarrenez batu ziren ekainaren 8an, eta bigarren hitzordu hau Galdakaon egin zuten. Bertan izan ziren, besteak beste, Balmasedako, Etxebarriko eta Karrantzako alkateak, Plentziako alkate ohia, Arrigorriagako alkateordea eta Galdakaoko Miguel Angel Martín atxiki gabeko zinegotzia.

Bilera horretan batutako 16 kideek komunean dute politika, baina ohiko alderdietatik kanpo egindako politika. Horregatik, «ikusgarritasun gehiago» aldarrikatu zuten hitzordu horretan, eta talde edo zinegotzi independenterik ez duten udalerriak horretara animatu zituzten: talde independenteak sortzera, «herritarren interesen alde kontraprestazio pertsonalik gabe lan egiteko».

Gainera, Euskadiko Ingurumen Administrazioaren legearen aurka azaldu ziren hitzordu honetako politikari gehienak, lege honek «udalen autonomia murriztu» egiten duelakoan.

Eta udalen autonomia aipatuta, balioan jarri gura izan zuten Karrantza, Balmaseda, Orozko, Plentzia, Zalla… eta talde independenteak agintean izan dituzten beste udalerri batzuetako «kudeaketa ona», Etxebarri kasu, «bere auzokideen babesa 30 urtetik gora jasotzen ari dena».

Bilera horretan izan ziren Jon Gerediaga Sopelako Denok Batera taldeko zinegotzia, Loren Oliva Etxebarriko alkatea —La Voz del Pueblo taldekoa—, Koldo Silva Abanto-Zierbenako Independientes Abanto-Zierbenako zinegotzia, Isabel Zarauza Plentziako alkate ohia —Agrupación Independiente Plentzia—, Maria Jesus Acedo alkateordea —Arrigorriaga Gara—, Aitor Larrinaga Balmasedako alkatea —Candidatura Local Independiente—, Joseba Zorrilla Zallako Zalla Bai taldeko zinegotzia, Raul Palacio Karrantzako alkatea —Karrantza Zabala—, Aitor Anchía Laudioko Omnia taldearen zinegotzia eta Miguel Angel Martín Galdakaoko atxiki gabeko zinegotzia.