Aisialdia
BINKE / 2022ko apirila

Datorren astean zabalduko dute udalekuetan izena emateko epea

TESTUA: Naia Bergaretxe Sarria
ARGAZKIAK: Oksanashufrych

Bueltan dira 4 eta 11 urte bitarteko umeentzako eguneko udalekuak Galdakaon eta Usansolon, eta datorren astean zabalduko dute izena emateko epea. Aurten ere, pasa den urteko ezaugarri berri batzuk mantenduko dira.

Pasa den urtean, segurtasun neurriak «bermatzekotan», neurri berriak ezarri ziren urteroko eguneko udalekuetan. Berrikuntza horiek aurtengo udalekuetan ere mantenduko dira, «lana eta familia bateragarri egiteko lagungarriak izango direlakoan, baita euskara indartzeko asmoz ere bai», adierazi du Galdakaoko Udalak.

Galdakaoko eta Usansoloko udalekuetako monitore eta beste langileek zenbait helburutan oinarrituta egiten dute lan, hala nola, partaideei gune ludiko bat euskaraz eskaintzea, inklusibitatea bermatzea, berdintasuna eta genero ikuspegia lantzea, hezikidetza, bizikidetza eta kulturartekotasuna lantzea eta ingurunearen ezagutza eta harekiko errespetua lantzea.

Aurreko urteko ezaugarri berrietan oinarrituta, hauek dira gobernu planaren 91. neurria betetzeko mantenduko direnak:

• Hiru txandaren artean aukeratu ahalko da: uztailaren lehenengo hamabostaldia —uztailaren 5etik 15era—, bigarren hamabostaldia —18tik 29ra— edo uztaileko lau asteak —5etik 29ra—.
• Jantoki zerbitzua egongo da.
• Harrera zerbitzua egongo da —doakoa—.

Ordutegia, honen araberakoa izango da, hau da, udalekua 09:30etik 13:30era izango da, baina, «familia bateragarri egiteko lagungarriak» eskainiko direnez, 08:30etik 09:30era harrera zerbitzua izango da eta 13:30etik 14:30era jantoki zerbitzua.

Gehienez 550 plaza eskainiko dira guztira, era honetara banatuta:

• Aperribai: 70 plaza —4 eta 11 urte bitarteko umeak—.
• Usansolo: 100 plaza —4 eta 11 urte bitarteko umeak—.
• Gandasegi: 180 plaza —4 eta 7 urte bitarteko umeak—.
• Urreta: 200 plaza —8 eta 11 urte bitarteko umeak—.

Izen ematea apirilaren 19an zabalduko da eta apirilaren 27an itxiko, eta telematikoki egin beharko da, Udalaren webguneko behealdean Udalekuak izeneko atalean. Hala ere, Euskara Arloko zenbakira deituta ere —944010540— hitzordua eskatu ahalko da zalantzak argitzeko.

Onartutakoen behin-behineko zerrenda maiatzaren 6an argitaratuko dela aurreikusten dute, eta zozketa egin beharrekotan —gehienezkoa baino izen emate gehiago badaude— maiatzaren 20an 14:00etan egingo litzateke ekitaldi publikoan. Behin emaitza jakinda, webgunean publikatuko da eta ordainketak egiteko epeak eta moduak ere publikatuko dira.

Prezioari dagokionez, iaz moduan, prezio estandar bat zehaztuko da, baina familien ezberdinen arteko berdintasuna bermatu nahian, erraztasun batzuk jarriko ditu Udalak eskuragarri: «Errenta baxuena duten familiek
%85erainoko hobaria lortu ahal izango dute».

Prezio orokorra txandaren araberakoa izango da, hau da, 60€ hamabostaldi bakoitzean —114€ jantoki zerbitzuarekin— eta 120€ uztaileko 5etik 29ra —228€ jantoki zerbitzua barne—. «Hobarien sistemari esker, halere, kuota orokor horien %30, %50 edo %85 artean txikitu daitezke elkarbizitza unitatearen diru-sarreren arabera».