Erabideren «El peso sobre mí» dokumentala, Zinema Ikusezinaren jaialdiko publikoaren saria
TESTUA: Jon Gomez Garai
ARGAZKIA: Erabide Emakume Elkartea
Etxeko zaintza lanak erdigunean jarri gura dituen «El peso sobre mí» dokumentalak publikoaren saria jaso du aurtengo Zinema Ikusezinaren Nazioarteko Jaialdian; eta Erabide elkarte galdakoztarrak egin zuen lan honen ekoizpena. Dokumentala ikusi nahi? Hemen duzu osorik ikusteko aukera!
Urriaren 20an antolatu zen, beste urte batez, Bilboko «Film Sozialak» Zinema Ikusezinaren Nazioarteko Jaialdia. Jaialdi honek esparru anitzeko gaiak lantzen dituzten ikus-entzunezko lanak sari bidez aitortzen ditu urtero. Saridunetako bat, aurten, Galdakaoko Erabide Emakume Elkarteak sortutako «El peso sobre mí» dokumentala izan da.
«El peso sobre mí» dokumentala Itxaso Díaz bilbotarrak zuzendu du, Erabide elkarte galdakoztarrarekin eta gobernuz kanpoko Farmamundi erakundearekin batera. Ikus-entzunezko honek etxeko zainketa lanei buruzko eztabaida jorratzen du, baita lan horrek dakarren isolamendua eta erantzunkidetasunik eza ere, bost lekukotasunen bidez. Eguneroko kontakizunen bidez, dokumentalak hausnarketa kolektiboa bultzatu nahi du, kasuen %70ean zaintzak emakumeek beren gain hartzen dituzten gizarte batean.
Dokumental honek, gainera, aurretik sarietarako hautagaitza andana jaso ditu; 11 hain justu, besteak beste eta Euskal Herritik kanpo, Galizan, Errioxan, Tarragonan, Valentzian, Turkian, Nigerian, Argentinan, Txilen eta Kolonbian.
Bilbon, Barakaldon eta Galdakaon dago grabatuta dokumentala eta 2021eko azaroan estreinatu zuten 16 minutuko lana. Hemen ikus dezakezu osorik, hainbat galdakoztar pantailaren aurrean ere ageri direla:
