Eskoletako menuan zomorroak agertzea «arazo puntuala» izan dela adierazi du Eusko Jaurlaritzak

TESTUA: Irati Alonso García
ARGAZKIA: EITB

EAEko eskola publiko batzuetan zomorroak agertu ziren astelehenean umeei eskainitako menuan, tartean Urreta eta Egia ikastetxe galdakoztarretan. Honek sortutako zeresanaren aurrean, «arazo puntuala» izan dela azpimarratu du Jokin Bildarratzek, Eusko Jaurlaritzaren Hezkuntza sailburuak. Hemen batu ditugu sailburuak emandako azalpenak.

Azkenaldian Araba, Bizkaia eta Gipuzkoako eskola publikoetako menuak zeresana ematen ari dira. Izan ere, jakiak egoera desegokian hornitzen zituen Serunion enpresari Eusko Jaurlaritzak kontratua eten berritan, Euskal Autonomia Erkidegoko eskola publiko batzuetan zomorroak agertu ziren astelehenean azaloreetan, Ausolan enpresak hornitutakoetan.

Urreta eta Egia ikastetxe galdakoztarrak izan ziren hauetako bi, zenbait gurasok eta jantokietako langileek BINKEri azaldutakoaren arabera.

Arazo honen aurrean, azalpenak eman ditu Jokin Bildarratzek, Eusko Jaurlaritzaren Hezkuntza sailburuak, «arazo puntuala» izan dela azpimarratuz. Radio Euskadiri eskainitako elkarrizketa batean azpimarratu zuen, «ez duela zerikusirik» kontratua eten zioten Serunion enpresarekin gertatzen zenarekin.

«Kontuan izan behar da egunero 85.000 otordu ematen dituztela Euskadiko ikastetxeek. Azalorean ohikoak diren zorriak agertu dira, besterik ez. Zerbait puntuala izan da, eta zorionez berehala konturatu ziren, ikasleen osasunean eragin gabe. Goratu nahi dut bazkarietan eskaintzen duten kalitatea», nabarmendu zuen Bildarratzek.

Sailburuaren esanetan, lehengaiarekin lotutako arazo bat izan da, «egunerokoan, produktu freskoak erosten ditugunean, gure etxean gerta daitekeen legez», hau da, ez duela jangelen ereduarekin zerikusirik.

Bildarratzek gogoratu zuen ere Hezkuntza Lege berrian jantokietako eredu berri bat ezartzeko pausoak proposatuko direla, «janaria bertan egiteko eredurantz».