Sormene
BINKE / 2020ko abendua

Feminismoa umoretik hartuta, «Erradikalak ginen» eskaini dute gaur Sormenen

TESTUA: Iñigo Larrea Labarrieta
BIDEOA: Binke

Sormeneren lehenengo egunari amaiera Ane Labaka bertsolariak eta Beatriz Egizabal antzerkilariak eman diote, feminismoan eta umorean oinarritutako «Erradikalak ginen» saioarekin.

Sormeneko lehenengo egunari amaiera emateko, arrastiko 19:00etan Torrezabalen Ane Labaka bertsolaria eta Beatriz Egizabal antzerkilari eta ipuin kontalaria egon dira «Erradikalak ginen» lana antzezten.

Labakak eta Egizabalek 2017. urtean «Erradikalak gara» obra aurkeztu ondoren, eta artisten esanetan «apustu arriskutsua egin ostean», obra horren jarraipena aurkeztu ahal izan dute aurten. Bi lanen arteko ezberdintasun nagusia jorratutako gaietan dago, lehenengo lanean feminismoak lantzen dituen gai orokorretan oinarritu baitziren artistak, eta bigarren honetan, emakumeen gorputz indibidualagoetan oinarritu direlako.

Horretaz aparte, obra egunerokotasunean gertatzen diren egoeren inguruko hausnarketan oinarritzen da, feminismotik eta umorez kritika gogoetatua eginez; betiere umore eta seriotasunaren arteko oreka mantenduz. Hortaz, ikuskizunean egungo diskurtso feministek lantzen dituzten hainbat gai jorratzen dira; hala nola, intersexualitatea, eraso sexistak, identitatea, estereotipoak, etiketak… Era berean, artista bakoitza bere disziplinan oinarritu da «Erradikalak ginen» aurrera eraman ahal izateko. Horregatik, obrak bertsoetan eta bakarrizketan oinarritzen den formatua dauka.

Artistek azpimarratu izan dute ikuskizunak bi helburu nagusi dituela: ikuslearen gogoeta piztea eta feminismora hurbilpen bat egitea. Garrantzi handikoa ere izan da emanaldian zehar heldutasun eta gaztetasun edota umore eta seriotasunaren arteko talka, indar handia eman baitio ikuskizunari.

Bihar, asteartea, egun guztian zehar literatura uztartuko da Imanol Epelderen literatura tailerraren eta Lizar Begoña, Leire Bilbao, Miren Agur Meabe eta Arkaitz Minerren literatura errezitaldiaren bitartez. Goizeko tailerra Galdakaoko ikastetxeei eskainia izango da, baina arratsaldeko saioa, aldiz, publiko ororentzat. Sarrera edota gonbidapenak saioaren aurretik eskuratu ahal izango dira Torrezabaleko leihatilan bertan, eta bertaratu ezin duenak, Binkeren webgunearen hasiera-orritik ere jarraitu ahal izango du zuzenekoa streaming bidez.