Galdakaoko PSE-EEk 16 zuzenketa aurkeztuko dizkio 2024ko aurrekontuei
TESTUA: Irati Alonso García
ARGAZKIA: Galdakaoko PSE-EE
Galdakaoko PSE-EEk 16 zuzenketa aurkeztuko dizkio Udal Gobernuak hurrengo urterako proposatutako aurrekontuei. Sozialisten helburuak «auzoak indartzea, gazteen emantzipazioa erraztea, tokiko merkataritza bultzatzea eta bizilagunen komunitateei etxebizitzak eraberritzen laguntzea» dira.
EH Bilduk, Auzoak-ek eta Usansolo Herriak osatutako Udal Gobernuak 48 milioi euroko aurrekontua aurkeztu du 2024rako. Aurtengoa baino %4,91 handiagoa da eta biharko osoko bilkuran onartzea aurreikusi du Udalak.
Galdakaoko PSE-EEK aldiz, zuzenketak aurkeztuko dizkio bilkura aurrekontu hauei. Zehazki, 16 proposatuko ditu, batez ere, «auzoak indartzeko, gazteen emantzipazioa errazteko, tokiko merkataritza bultzatzeko edo bizilagunen komunitateei etxebizitzak eraberritzen laguntzeko» helburuz.
Victor Trimiño bozeramaile sozialistak azaldu duenez, gizarte politiken alorrean milioi erdi euro inguruko neurriak proposatu dituzte hainbat ekintza martxan jartzeko, besteak beste, mendekotasuna duten adinekoentzako etxez etxeko janari-zerbitzua abian jartzea, emantzipatu nahi duten udalerriko gazteentzat alokairurako laguntzak ematea edo enplegu-planetarako partida handitzea.
PSE-EEren «beste lehentasunetako bat» auzoak hobetzea da eta horretarako 300.000 euro inguru bideratzea proposatu dute Aperribai eta Bengoetxe auzoetan erabilera anitzeko kirol-instalazioak eta zaborrak pneumatikoki biltzeko sistema jartzeko azterlanak hasteko, Olabarrietako irisgarritasuna eta argiztapena hobetzeko, Urtebietako sindikatuen lokalak egokitu eta eraberritzeko eta Meatzeta inguruan, Usansolon eta Urretako kiroldegiaren ondoan lurpeko aparkalekuak eraikitzea bideragarria den aztertzeko.
Halaber, beste hainbat ekintza proposatuko dituzte sozialistek zuzenketetan, hala nola, saltoki gisa erabiltzeko lokalak eta lonjak erostea, alokatzea edo eraberritzea sustatzen duen plana sortzea; edo 200.000 euroko laguntza sortzea, «gehien behar duten etxebizitzetako bizilagun-erkidegoek irisgarritasuna eta energia-eraginkortasuna hobetu dezaten».
«Energia aurreztearen eta jasangarritasunaren auziarekin bat etorriz aldiz», Galdakaoko PSE-EEk proposatuko du 70.000 euro erabiltzea eraikin publikoetan autokontsumorako eguzki-plakak jartzeko, eta 70.000 euro bideratzea Arantzilleko urtegiaren ingurunea egokitzeko eta hobetzeko.
«Zuzenketa hauek gure bizilagunen beharrei benetan erantzungo dieten udal-aurrekontuak lortzen lagunduko lukete», nabarmendu du Trimiñok.
