Galdakaoko Txirrindulari Gelak kadeteen taldea sortzeko erronka solidarioa antolatuko du
TESTUA ETA IRUDIAK: Irati Alonso García
Galdakao Txirrindulari Elkartearen Gelak urtero antolatzen duen erronka solidarioaren laugarren edizioa zapatuan, ekainak 1, izango da Mozoilo Egunaren baitan, eta kadeteen taldea sortzeko helburua izango du. Ohi duenez, Gelak ume eta helduei zuzendutako hainbat ekintza antolatuko ditu egunean zehar eta hemen batu dugu egitarau osoa.
Beste urte batez, Galdakaoko Txirrindulari Elkartearen Gelak erronka solidarioa antolatuko du. Oraingoan zapatuan, ekainak 1, izango da Mozoilo Egunaren baitan eta kadeteen talde bat sortu ahal izatea izango da. «Gogora ekarri nahi dugu ere pasa den urteko erronka, Harrietentzako bizikleta egokitua, abian dela eta urrian prozesuari buruzko dokumentala estreinatuko dugula», azaldu zuen atzo Igor Anton Gelako arduradunak erronkaren aurkezpenean.
Antonekin batera izan ziren Javi Delgado Palenque, Galdakaoko udaltzaina; Iñigo Hernando alkatea, eta Asier Korta Kirol zinegotzia. Azken honen hitzetan, «oso garrantzitsua da erronka honek ahalbidetuko duena, eskola kiroletik federatura igarotzean Galdakaon txirrindularitzan aritzen jarraitu ahal izatea».
Ildo honetan ere aritu zen Alvaro Sordo, Galdakaoko kadeteen txirrindulari taldeko arduraduna izango dena: «Umeak direnean hasten dira gurekin eta nahi duguna kirol federatura heltzean gurekin geratzea da».
Kadeteen taldea lortzeko helburu honetarako zapatuan hainbat ekintza antolatuko dituztela iragarri zuten Gelako kideek eta hemen batu ditugu:
9:00-20:00 ‘Gailur mugakideen erronka’, 200 km bost bloketan
10:00-12:45 Spinning saio hirukoitza
11:50-13:00 ‘Zaratamo, harrobien itzulia’ martxa herrikoia, 21 km
13:15-13:45 Txiki Martxa Galdakaoko kaleetan zehar, 6-14 urteko umeentzat
17:00-20:00 Gelaren ginkana Handia, Ardanza parkean
19:50-20:10 ‘Igoera herrikoia’ Plazakoetxetik Ardanza parkeraino
20:15 Erronkaren amaiera, oparien zozketa eta oroigarrien banaketa
Ekintzetan izena eman eta informazio gehiago eskuratu daiteke Galdakao Txirrindulari Gelaren webgunean.
Hemen Igor Anton Galdakao Txirrindulari Elkarteko Gelaren arduradun Igor Antonen eta Asier Korta Galdakaoko Udaleko Kirol zinegotziaren adierazpenak:
