Galdakaoko Udalak 11,5 bider handituko du Erletxe industrialdeko dirulaguntza
Ekonomia
BINKE / 2022ko maiatza
Galdakaoko Udalak 11,5 bider handituko du Erletxe industrialdeko dirulaguntza
TESTUA ETA ARGAZKIA: Binke
Orain bi urte sortutako Erletxe Industrialdeko Enpresen Elkarteak bere lehenengo Batzar Orokorra egin du gaur Galdakaoko Torrezabal Kultur Etxean. Datozen hilabeteetarako inbertsio asko iragarri dituzte, tartean ibilgailuen matrikulak identifikatzen dituen kamerak jartzea edota Udalak 10.000 eurotik 115.000 eurora igo duen dirulaguntza jasotzea.
Bizkaiko industrialderik handiena da Erletxekoa, izen bereko auzo galdakoztarrean kokatuta dagoena. Ordea, urte askotan bertako enpresen arteko proiektu komunik egon ez denez, «sortu barri dan alkartearen bitartez asko hobetuko» dela esan du Iñigo Hernando alkateak, gaur elkarteak lehenengoz antolatu duen Batzar Orokorrean. Bada, elkarte honi bideratutako dirulaguntza 11,5 bider handituko du Udalak aurten.
Alkateak ireki du Erletxe Industrialdeko Enpresen Elkartearen (EIEE) Batzar Nagusia, Begoña Ojanguren EIEEko presidentearen gonbidapenez. Aurkezpenean Hernandok «Galdakaoko Udalarentzat Erletxe industrialdea estrategikoa» dela azpimarratu du, «baita politikoki be». Gainera, Hirigintza Plan berrian kontuan hartuta dagoela gogoratu eta berau handitzeko asmoa duela ere iragarri du. «Baina ganera, enpresak erakartzea be lortu behar dogu», adierazi du Udalaren ordezkari nagusienak.
Bere berben ostean, Ojangurenek Batzar Nagusiko puntuei ekin die, eta berri inportanteak iragarri dizkie Torrezabal Kultur Etxearen areto nagusira gerturatu diren industrialdeko enpresariei, gehienak poligonoa bera hobetzera bideratuko diren berriak.
Egingo diren inbertsioak azaldu aurretik, elkarteko presidenteak eta beste hainbat kidek jaso dituzten eta jasoko dituzten dirulaguntzen berri eman dute. Nabarmenak dira jasoko dituzten dirulaguntzak, eta horiei erreparatzea garrantzitsua ikusten du hedabide honek. Bada, Galdakaoko Udalak esaterako, 2020tik 2022ra bitarte 11,5 aldiz handituko du industrialde honetara bideratuko duen dirulaguntza. Bizkaiko Foru Aldundiak berriz, 5,5 bider handituko du 2021etik hona.
Erletxe Industrialdeko Enpresen Elkartearen diru-iturriak publikoak dira, eta Aldunditik zein Udaletik baino ez dute babesa jasotzen. Hauek dira azken urteotan —aurretik ez zen elkartea bera existitzen— EIEEk jasotako dirulaguntzak:
- Galdakaoko Udalak, 2020an, 10.000€.
- Bizkaiko Foru Aldundiak, 2021ean, 12.750€.
- Galdakaoko Udalak, 2021ean, 20.000€.
- Bizkaiko Foru Aldundiak, 2022an, 71.221€.
- Galdakaoko Udalak, 2022an, 115.000€.
Iaz 32.750 euroko dirulaguntza izan zuen Erletxeko industrialdea hobetzeko eta kudeatzeko sortutako elkarteak. Aurten berriz dirulaguntza hori 186.221 eurokoa izango da.
Lehenengo inbertsioak
«Jasotako dirua alkarteak ez dau bere batzordeko kideak ordaintzeko erabiliko, guk lan bolondresa egiten dogulako», esan du Ojangurenek, «danona dan industrialdea hobetzeko erabiliko dogu —eta erabiltzen gabiz— diru kopuru hori». Egin diren edo egingo diren lehenengo inbertsioak sergutasuna hobetzeko, seinaletika berrizteko eta mantentze-lanetarako izango dira bereziki.
Segurtasunean, esaterako, bideozaintzako bost kamera berri jarri dira industrialdean zehar. Horietariko bana sarreretan dago —sarrera bi baino ez ditu poligonoak—, eta bertatik sartu eta irtetzen diren ibilgailu guztien matrikulak identifikatzen ditu, «poliziak edozein unetan behar izan ezkero, eurei bidaltzeko», abisatu dute elkartekoek. Are gehiago, orain dela gutxi lapurreta baten ondorioz Ertzaintzari irudiak bidali zizkiotela ere gogoratu du elkarteko batzordekide batek.
Matrikulak identifikatzeko bi kamera horiez gain, beste hiru kamera domotika sistemaren bitartez jarri dituztela azaldu dute gaur, «sartzen diren ibilgailu guztien ibilbidea, noranzkoa eta toki bakoitzean ematen duen denbora kontrolatzeko», azaldu dute EIEEko kideek. Neurri hauekin lapurretak eta bandalismoa ekidin gura dute.
Industrialdeko eta plataforma bakoitzeko sarreretan dauden seinaleak ere berriztu egingo dituzte, eta zein plataformatan zauden adieraziko duten panel berriak jarriko dira. Argiteria ere hobetu egingo da, «farola asko jausita edo matxuratuta dagozalako», onartu du elkarteko buruak.
Erletxe Industrialdeko Enpresen Elkarteak, jasotzen duen dirulaguntzaz gain, Udalari bere funtsetatik inbertsio gehiago egitea ere eskatu dio; hala nola, asfaltatze lanak egitea —«bereziki sarrerako errepideak zuloz beteta dagozalako», aldarrikatu dute bertaratutako zenbait enpresarik— edota espaloiak hobetzea. Eskatutako hori «Udalaren ardura da gainera», gogoratu du publikotik hainbatek.
Baina Erletxeko industrialdea lursail publiko eta pribatuz beteta dago, eta «nahasmena sortzen da sarri, eremu bakotxa nork ordaindu behar dauan jakiteko», onartu du Ojangurenek. Horregatik, horren aurrean, EIEEk egingo duen beste inbertsio bat ikerketa juridikoa kontratatzea izango da, eremu bakoitza norena den ezagutu eta beraz, konponketa-lanak nori dagozkion zehazteko.
Erletxe Industrialdeak webgunea ere estreinatu du eta bertan izena eman dezake lantegi multzo honetan dagoen edozein enpresak. Horretaz gain, ondasunen bat saltzeko edo alokatzeko duenak ere bertan iragarri dezake bere eskaintza.
Datorren urtera begira, Erletxen lantegia duten jabeek euren jabetzaren metro karratu bakoitzeko 0,50€ ordaintzea ere proposatu du elkarteak, «bazkideak ez daukaguzanez, eta edozein komunitatetan egiten dan moduan, bakotxak bere alea jarri eta hobekuntza gehiago egin ahal izateko industrialdean», justifikatu dute Batzar Orokorrean.
Erletxe industrialdeak 142 enpresa hartzen ditu gaur gaurkoz, eta horietariko 86 dira EIEE elkarteko bazkide —iaz baino 38 enpresa gehiago—.
Kontaktua:
www.poligonoerletxe.eus
poligonoerletxe@gmail.com
