Galdakoztar bat eta usansolotar bat, Rockein jaialdiko irabazleen artean

TESTUA: Irati Alonso García
ARGAZKIA: Sweet Rage taldearen sareetatik

Zapatuan, azaroak 18, Rockein jaialdiaren finala antolatu zen Basauriko Social Antzokian. Hitzorduan hamaikagarren edizioko sariak banatu zituzten eta besteak beste, usansolotar bat eta galdakoztar bat saritu zituzten euren taldeekin batera. Hemen batu ditugu kategoria bakoitzeko irabazleak.

Rockein jaialdiak hamaikagarren edizioa ospatu du aurten eta zapatuan, azaroak 18, izan zen final handia Basauriko Social Antzokian. Hitzorduan aurtengo irabazleak iragarri zituzten eta hauek sariak jaso zituzten antolatzaileen eskutik.

Lau kategoriatan banatu zituzten sariak: artistarik onena; euskarazko artistarik onena; Eskarabillera saria eta tokiko artistarik onena. Azken hau Aingeru Guerrero usansolotarraren Sweet Rage taldeak irabazi zuen eta honi esker MAZ Basauri jaialdian edo Bizkaiko aretorik onenetariko batean jotzeko aukera izango du.

Euskarazko artistarik onena ordea, Andoni Alonso galdakoztarraren Islabat banda izendatu zuten eta abesti bat grabatu ahal izango dute eta baita MAZ Basauri jaialdian edo Bizkaiko aretorik onenetariko batean jotzeko aukera ere.

Sari nagusia Lova Loisentzat izan zen eta Eskarabillera saria Nun taldearentzat.