Garazi Navasek Eusko Ikaskuntzaren Gazte Saria irabazi du

TESTUA: Irati Alonso García
ARGAZKIA: Eusko Ikaskuntza

Garazi Navas usansolotarrak eta Maite Aizpuruak aurtengo Eusko Ikaskuntza-Laboral Kutxa Gazte Saria irabazi dute. ‘Adarbakarra eta soinujolea’ lan performatiboagatik jaso dute saria.

Eusko Ikaskuntza-Laboral Kutxak Sariak 35 urtetik beherako gazteek Humanitate, Kultura, Arte edo Gizarte Zientzien arloan sormen edo ikerketa lanak egitea babesten ditu 2019tik eta aurtengo sariaren irabazleak iragarri dituzte honezkero: Garazi Navas usansolotarra eta Maite Aizpurua zumaiatarra.

Bikoteak ‘Adarbakarra eta soinujolea’ lan performatiboagatik jaso du saria. Honetan euskal kulturaren irudimenean, mitologian eta erreferentzietan ikertzea proposatzen dute, ikuspegi queer-feminista eta garaikidean oinarrituta.

Umorea eta poesia baliatuz, eta diziplina arteko tresnak erabiliz, ‘Adarbakarra eta soinujolea’ lanak gaur egungo euskal topikoei buruz esperimentatzen du, gogoeta eta begirada berriak ikusaraziz.

Garazi Navas usansolotarra akordeoijolea da eta herriko hainbat ekintzatan parte hartu ohi du, besteak beste, jaietan eta kultura ekimenetan.