Gaur da Santakurtzetako pregoilaria bozkatzeko azken eguna
TESTUA: Irati Alonso García
ARGAZKIA: Peio Zamalloa
Irailaren 13tik 22ra ospatuko dira Santakurtzak eta aurten ere jaietako pregoilaria herritarrek aukeratuko dute. Gaur da bozkatzeko azken eguna eta bederatzi hautagaien artean aukeratu ahal dute herritarrek.
Aurtengo Santakurtzak irailaren 13tik 22ra ospatuko dira, Jai Batzordeak eta Galdakaoko Udalak jakinarazi zutenez. Ohikoa denez, pregoilariak paper berezia izango du Galdakaoko jaietan eta aurten ere herritarrek aukeratuko dute.
Herritarrek proposamenak egin ostean, gaur arte, uztailak 10, dute bozkatzeko epea. Guztira bederatzi hautagaien artean aukeratuko dute Galdakaon erroldatuta dauden eta 16 urtetik gora dituzten auzokideek.
Hemen batu dugu zerrenda osoa:
- Gorantza, Galdakaoko emakumezkoen futbol taldea: 1966 eta 1971 urte bitartean jokatu zuen emakume futbolarien taldea aitzindari izan zen Euskal Herriko futbolean
- Galdakao Txistu Banda Ad libitum Elkartea: Galdakaoko txistu banda
- Pilar Etxebarria Villegas: pazienteek asko estimatzen duten medikua eta Galdakaoko anbulatorioko zuzendaria
- Oier Ibarretxe: Boxeolari galdakoztarra, Europako txapelketa bat lortu zuena eta Parisko Joko Olinpikoetarako sailkatu dena
- Elkarlaguntza Sarea Galdakao: Bere jarduera justizia sozialean oinarritzen duen herriko kolektiboa
- Galdakaoko Bolei Taldea: Aurten 50 urte bete dituen Galdakaoko kluba
- Ibaizabal ST: Galdakaoko saskibaloi kluba
- Joseba Loroño Yurrebaso: Mediku galdakoztarra, gure herriko hainbat kirol ekitaldiren babeslea, Elexalde tenis taldearen sortzailea, eta Medikuen Txirrindularitza Txapelketako txapelduna estatu mailan
- Eider Eibar: Galdakaoko bizilagun izaten urte asko daramatzan marrazkilaria
Hautaketan ohiko partaidetza plataformaren bidez parte hartu ahal izango da
eta pertsona bakoitzeko boto bat onartuko da. Plataforma digitalaz gain, hurrengo tokietan ere
eman daiteke botoa, horretarako jarri diren orriak kutxatiletan sartuz:
- Torrezabal Kultur Etxea
- Urreta kiroldegia
- Udaletxea
- Aperribaiko liburutegia
