Gazte Eguna bueltan da: maiatzaren 7an antolatuko da Galdakaon
Jaia
BINKE / 2022ko martxoa
Gazte Eguna bueltan da: maiatzaren 7an antolatuko da Galdakaon
TESTUA: Jon Gomez Garai
ARGAZKIA: Aitzol Zamalloa
Orain bi urte birtualki ospatu zen eta iaz bertan behera utzi behar izan zen Galdakaoko Gazte Eguna. Baina aurten bueltan datorrela baieztatu du Gazte Eguneko antolakuntzak bere Instagram kontutik argitaratutako bideoan.
Enegarrenez errepikatu da jendartean errealitate hau: pandemiak mundua gelditu zuen. Nabarmena izan da gaitzak munduan eragindako hutsunea, eta gure egunerokotasuna ere horren isla izan da. Gure egunerokotasuna, gure ohiturak, gure hitzorduak… Eta gure jaiak. Horren parte ere izan da Galdakaoko Gazte Eguna.
«Orain bi urte ahaleginak egin genituen eta birtualki ospatu genuen Gazte Eguna», adierazi dute Gazte Eguna antolatzeko ardura duten herritarrek bideo bidez. Aldiz, iazko edizioa bertan behera geratu zen, bere osotasunean. Horregatik aurten, data gordetzeko eskaria egin die Gazte Egunak gazte galdakoztarrei: maiatzaren 7an ospatuko baita, egoerak uzten badu, betiko egitarau antzekoarekin.
Azken baieztapen hori Gazte Eguneko antolakuntzak bere Instagrameko profiletik egin du, aurten paellak, herri-bazkaria, elektrotxaranga, ekitaldia eta kontzertuak egongo direla iradokiz.
