Gizon bat atxilotu dute Galdakaon, aizkora batekin bi pertsonari erasotzea egotzita

TESTUA: Irati Alonso García
ARGAZKIA: Criminal Defense

Ertzaintzak gizon bat atxilotu zuen astelehenean Galdakaon, aizkora batekin bi pertsonari erasotzea egotzita. Gertaerak urtarrilaren 5ean jazo ziren Zaratamon eta Segurtasun Sailak adierazi duenez, biktimek eta erasotzaileak eztabaida izan zuten bezperan Ugaoko taberna batean.

Eusko Jaurlaritzako Segurtasun Sailak azaldu duenez, Ertzaintzak gizon bat atxilotu zuen astelehenean Galdakaon. Atxilotuak aizkora batekin bi pertsona erasotu zituen, eta horietako bati ebakuntza egin behar izan zioten, zaurien larritasunagatik. Gainera, bere txakurra xaxatu zuen biktimei eraso egin ziezaien.

Gertaerak urtarrilaren 5ean, gauean, jazo ziren Zaratamon. Biktimen bertsioaren arabera, Ugaoko kopa-lokal batean bezperan eztabaida izan ondoren, atxilotutako gizonari azalpenak eskatzera joan ziren.

Orduan, pertsona horrek aizkora bat hartu eta bien kontra jo zuen, eta, gainera, bere txakurra xaxatu zuen haiei eraso egin ziezaien. «Txakurraren hozkadek eta aizkorak eragindako lesioen ondorioz, bi zaurituek ospitalera joan behar izan zuten, batek zauri larriak baitzituen gorputzeko hainbat ataletan, eta ebakuntza egin behar izan zioten», adierazi dute Segurtasun Sailetik. 

Gertatutakoaren berri izan zutenean, Ertzaintzako agenteek Galdakaoko polizia-egoitzan zitatu zuten ustezko erasotzailea, eta bertan atxilotu zuten giza hilketaren saiakera delitua leporatuta.

Bestalde, bere etxean aizkora eta hasiera batean biktimak mehatxatzeko erabili zuen urpeko arrantzarako fusil bat konfiskatu zizkioten. Gainera, txakurra udal-txakurtegira eraman zuten, eginbideak amaitu bitartean.

Antzeko ekintzengatik aurrekariak dituen atxilotua epailearen eskuetan utzi zuten, eta guardiako epaileak aske utzi zuen biktimekiko kautelazko neurriak ezarrita.