Koldo Cando galdakoztarra Munduko Polizia eta Suhiltzaileen Jokoetan izango da

TESTUA: Jon Gomez Garai
ARGAZKIA: Koldo Candok bidalita

Txinako azken edizioan urrezko domina batekin itzuli ostean, Koldo Cando Galdakaoko udaltzain ohiak Munduko Polizia eta Suhiltzaileen Jokoetan hartuko du parte berriz, uztailaren 22tik 31ra bitarte Rotterdamen.

Bi urterik behin antolatzen diren Munduko Polizia eta Suhiltzaileen Jokoetan hartuko du parte, beste behin, Koldo Cando udaltzain galdakoztar ohiak. Aurtengo edizioa Rotterdamen antolatuko da uztailaren 22tik 31ra bitarte.

Galdakaok ordezkaritza izan du Munduko Polizien eta Suhiltzaileen Jokoetan 2005etik. Orduan Kanadako Quebecen izan ziren Galdakaoko zenbait udaltzain, eta geroztik Australian, New Yorken, Los Angelesen edota Txinan izan dira galdakoztarrak, besteak beste.

Gainera, galdakoztarrek parte hartu izan dutenean hainbat sari ere ekarri izan dute Galdakaora, atletismoan, taekwondoan edota ekipoen triatloi probetan tarteko. Joko hauetan eskuratutako lehenengo domina, esaterako, Javi Delgadok lortu zuen zilarrezkoa izan zen, Quebecen 2005ean; azkena, Koldo Candok berak lortu zuen urrezkoa txandakako triatloian Txinan.

Aurtengo ediziora berriz Koldo Cando bakarrik doa parte hartzera —erretiroa hartuta badu ere agente ohiak, Jokoen araudiak baimendu egiten duelako—. Atletismoan, cross country eta taldekako triatloian hartuko du parte galdakoztarrak.

Argazkian Koldo Cando bera, 2019an Txinako Chengdú hiriko Jokoetan.