Lurralde kontseiluak abiatuko dira Galdakaoko lau eremutan, Auzotik proiektuaren baitan
TESTUA: Irati Alonso García
ARGAZKIA: Google Maps
Herriko auzoen garapen integrala eta orekatua bultzatzen duen Auzotik Galdakao proiektua Aperribai eta Urreta eremuetan abiatu zen. Orain herriko gainerako eremuetan ere lurralde kontseiluak eratuko dira.
Galdakaoko auzoen egoera hobetzen jarraitzeko asmoz, Udalak ‘Auzotik Galdakao’ proiektua jarri zuen martxan 2023an. Egitasmoa bi eremutan abiatu zen, Aperribai eta Urreta, eta orain proiektua herri osora zabaltzen doa pixkanaka.
Prozesuan zehaztutako 3, 4, 5 eta 6 eremuetan landuko da orain proiektua eta hauek dira guneak:
- 3. eremua: Altamira, Askarri, Gumuzio, Kortederra, Padrola, Artola, Basozabal, Bekea, Bekelarre, Itzaga, Basabe, Belategi, Egia, Elexalde, Errekalde, La Mina, Uraburu, Usargoiti eta Olabarri
- 4. eremua: Bengoetxe, Troka, Ergoien, Zuhatzu eta Upomendi
- 5. eremua: Kurtzea, Tximelarre Bekoa eta Zabalgane
- 6. eremua: Berezikoetxe eta Zabalea
Zehazki, eremu hauetan lurralde kontseiluak martxan jartzea adostu zuen Galdakaoko udalbatzak abenduan egindako osoko bilkura.
Lankidetza organoak dira kontseiluak, lurralde estrategiak egiteko eta zehaztutako konpromisoen jarraipena egiteko organoak. Hiru ordezkaritza mota aritzen dira elkarlanean kontseiluetan: ordezkaritza politikoa (alkatetza eta zinegotziak), teknikoa (udal profesionalak eta proiektuen talde teknikoak) eta herritarrak (talde eragileak, elkarteak eta banakoak). 1. eta 2. eremuetan dagoeneko martxan dira kontseiluak, eta beraz, gaurko onarpenarekin, eremu guztietakoak eratuta daude.
