Miren Arzalluz galdakoztarra, Bilboko Guggenheim Museoko zuzendari berria
TESTUA: Irati Alonso García
ARGAZKIA: James Weston
Bilboko Guggenheim Museoko patronatuak Miren Arzalluz galdakoztarra izendatu du museoaren zuzendari berria. Arzalluz Artearen Historian lizentziaduna da eta azken sei urteetan Parisko Palais Galliera museoa zuzendu du.
Bilboko Guggenheim Museoko zuzendaria 32 urtez izan ostean, urte bukaeran kargua utziko zuela iragarri zuen Juan Ignacio Vidartek. Hori horrela, Miren Arzalluz galdakoztarra izendatu du patronatuak museoaren zuzendari berria. Ezohiko bilkura izan du gaur, azaroak 12, Bilboko Guggenheim museoko patronatuak, eta bertan jakinarazi dute izendapena.
Arzalluz Artearen Historian lizentziaduna da, jantzien Historian espezializatuta, eta azken sei urteetan Parisko Palais Galliera museoa zuzendu du, modarekin lotuta mundu osoan dagoen museorik garrantzitsuenetakoa.
Arzalluz Bilboko Guggenheim Museoko Zuzendari Nagusi Hautetsi izendatuko dute 2025eko martxoaren 1ean eta izendapenak egun horretatik aurrera izango du eragina.
Lau astez, apirilaren 1era arte, murgiltze-prozesu bat egingo du Bilboko eta New Yorkeko Guggenheim museoetan, Vidarte Museoko Zuzendari Nagusiarekin batera.
