Petit Komité galdakoztarra, EAEko jatetxerik onena The Fork-en arabera

TESTUA: Irati Alonso García
ARGAZKIA: Petit Komité

The Fork plataformak Espainiako 100 jatetxe onenen urteko zerrenda kaleratu du eta honetan Petit Komité galdakoztarra agertzen da, 17. postuan. Plataformaren erabiltzaileek EAEko jatetxerik onena izendatu dute, pasa den urtean jarritako aipamenen bitartez.

The Fork online erreserba plataformak urtero kaleratzen du Espainiako 100 jatetxe onenen zerrenda, erabiltzaileek jarritako aipamenetan oinarritutakoa. Zehazki, erabiltzaileen iritzien kalitatea eta kantitatea izaten du kontuan plataformak zerrenda osatzeko.

2024ko zerrenda argitaratu du honezkero eta erabiltzaileen arabera Bartzelonako L’Antiquari Gastronòmic izan zen pasa de urteko jatetxerik onena.

Jatetxe galdakoztar bat ere agertzen da zerrenda honetan aurten: Petit Komité. Jose Iraragorri futbolari ohiaren familiaren jatetxeak erabiltzaileen 250 aipamen inguru jaso zituen 2024an, bataz besteko 9,9ko puntuazioarekin.

Zerrendan EAEko beste jatetxe bat baino ez da agertzen, Martín Berasateguik Lasarten duena. Azken hau The Forken zerrendako 21. postuan dago, beraz, galdakoztarra EAEko jatetxerik onena aukeratu zuten plataformaren erabiltzaileek.