Covid-aren aurkako neurriak
BINKE / 2021eko martxoa
Sinadura-bilketa hasi dute ostalariek, ixteko ordua atzeratzea eskatuz
TESTUA ETA ARGAZKIA: Jon Gomez Garai
Ostalaritzaren itxiera ordua 21:30etara luzatzeko sinadura-bilketa egiten hasi dira asteburu honetan, Usansolon eta Galdakaon ere. Asteazkenera bitarte 10.000 sinadura batu gura dituzte.
Aste honetan, Galdakaoko eta Usansoloko zenbait tabernetan ere Bizkaiko tabernarien elkarteak deitutako sinadura-bilketaren orriak ikusi dira, gure herrietako ostalariek banatuta. Orri honek dioenaren arabera, «Eusko Jaurlaritzak ezarritako ordutegiaren luzapena eskatzen dugu».
Gaur egun, etxeratze-agindua 22:00etan dago, eta tabernek 20:00etan itxi behar dituzte euren ateak. Sinadura-bilketa honekin, Bizkaiko tabernariek euren negozioak agindu hori baino ordu erdi lehenago itxi ahal izatea eskatzen diote Eusko Jaurlaritzari, hau da, 21:30ean.
Horregatik, 10.000 sinadura bildu gura dituzte Bizkaia osoan asteazkenera bitarte, Eusko Jaurlaritzaren LABIren batzordeari eskaini ahal izateko eta, horrekin, ostiralean eman beharreko LABIaren pauso barrietan eragin ahal izateko.