Euskaltzaindia
BINKE / 2022ko otsaila

Euskaltzain galdakoztarrak omendu ditu Udalak

TESTUA: Naia Bergaretxe Sarria
ARGAZKIA: Galdakaoko Udala

Euskaltzain galdakoztarrak diren Jesus Eguzkitza, Manu Etxebarria, Nagore Etxebarria eta Asier Bidart omendu zituen atzo Udalak Ama Hizkuntzaren Nazioarteko Egunean.

Pasa den azaroan argitaratu zuen Binkek Jesus Eguzkitza, Eguzki, Arrazolan jaiotakoa dena eta Galdakaon 46 urte daramatzana, ohorezko euskaltzain izendatu zutela Euskaltzaindian. Hala ere, Galdakaok beste hiru euskaltzain ditu: Nagore Etxebarria, Manu Etxebarria eta Asier Bidart, azken bi hauek Binkeren hileroko kolaboratzaileak dira.

Udalak «orain arte aitortzarik jaso ez duten» Euskaltzaindiako lau kide hauei omenaldia egin zion atzo udaletxeko pleno aretoan, Ama Hizkuntzaren Nazioarteko Eguna hautatuz: ohorezko euskaltzaina den Eguzkitza, Deustuko Unibertsitateko irakaslea eta 1991tik euskaltzaina den Manu Etxebarria zeberiotarra, 2013an euskaltzain izendatu zuten Nagore Etxebarria usansolotarra eta Udaleko hizkuntza teknikaria eta 2018tik euskaltzaina den Asier Bidart galdakoztarra izan ziren omenduak.

Haiekin batera, familia eta hurbileko lagunak izan ziren bertan Iñigo Hernando alkatea, Edurne Espilla Euskara zinegotzia eta euskalgintzako ordezkariekin batera. Ama hizkuntzaren alde egin behar dela aldarrikatu zuten, eta «nork bere etxeko euskara, euskalkia» mantenduz gero, «euskal kultura aberasgarriagoa» izango dela nabarmendu zuten.

Udalak, aitortza honetan, zilarrezko haritz hosto bana eman zien omenduei, haien egunerokotasunean euskararengatik egindako lana eskertzeko.